DILI, STLTIMORLESTE.com – Sekretaria Estadu ba Igualdade (SEI) halo kolaborasaun ho ESCAP no UN Women, lansa ona konsulta nasional durante loron 3 kona-ba avaliasaun no Investimentu iha ekonomia kuidadu iha dia 30 Setembru too 2 Outubru 2025 iha Dili, hodi hametin asaun nasional kona-ba kuidadu, igualdade jeneru no dezenvolvimentu sustentavel.
Liu husi komunikadu neebe STL asesu Kinta (05/11/2025), iha abertura Sekretaria Estadu ba Igualdade, Elvina Sousa Carvalho dehan, kuidadu tenke rekonese hanesan sentral ba progresu sosial no ekonomiku.
“Haree ba ita-nia sosiedade no ekonomia nia laran. Investimentu iha kuidadu laos deit imperativu moral, maibe estratejia dezenvolvimentu neebe matenek atu asegura ita-nia nasaun bele funsiona ho diak,” dehan nia.
Nunee mos Cai Cai, Xefe Seksaun Igualdade Jeneru no Inkluzaun Sosial iha ESCAP, reforsa ona parseria orgaun rejional ho Timor-Leste no lideransa neebe aumenta iha nasaun laran tomak iha Azia no Pasífiku.
“Iha komprensaun ida-neebe hatudu katak ita-nia sosiedade sira la bele haree, maibe dala barak sira nafatin la haree no la hafolin. Hau hanoin laos deit kona-ba justisa, maibe importante tebes ba ekonomia sira neebe reziliente, inkluzivu no sustentavel,” katak nia.
Iha parte seluk, Reprezentante UNICEF iha Timor-Leste, Koordenadora Rezidente ONU Ad Interinu, Patrizia DiGiovanni afirma, esforsu ida-nee sei rekere kolaborasaun iha setor hotu-hotu entre lina ministeriu, ajensia dezenvolvimentu, sosiedade sivíl no komunidade lokal sira. Ida nee sei presiza aprosimasaun ida neebe komprensivu ba dezafiu sira neebe iha.
Nia hatutan, ba ekipa Nasoins Unidas nian ida-nee nuudar prioridade ida-neebe fahe ba malu.
“Ajensia ONU barak prontu atu servisu hamutuk ho instituisaun nasional sira, sosiedade sivíl no parseiru dezenvolvimentu sira hodi asegura katak kuidadu nee rekonese, hamenus, fahe fali, fo kolen no reprezenta,” katak nia.
Konsultasaun nasional nee koalia liu kona-ba Timor Leste nia vontade polítika neebe forte no vizaun ba oin atu harii sistema kuidadu inkluzivu, ekuitativu no sustentavel ida, hodi kontribui ba kompromisu sira nasaun nian tuir jenda dezenvolvimentu sustentavel tinan 2030 nian no planu servisu rejional ASEAN nian neebe emerjente kona-ba ekonomia kuidadu nian.
Jornalista: Emerenciana Pinto
Editora: Domingas Gomes
