DILI, STLTIMORLESTE.com – Konselhu Ministru aprova projetu Rezolusaun Governu neebe autoriza, iha kuadru konstitusional no legal, partisipasaun husi FALINTIL – Forsa Defeza Timor Leste (F-FDTL) iha misaun ida ba apoiu umanitariu no protesaun sivil iha Republika Filipinas.
Tufaun Kalmaegi neebe akontese iha loron 4 Novembru 2025 iha Filipina, anin boot liu 180 km/h no udan boot neebe hamosu inundasaun derrepente no rai-halai.
Tuir autoridade lokal sira, akontesimentu nee halo ema mate liu 140, ema nulu ba nulu (dezenas) lakon no destruisaun ba infraestrutura importante sira, inklui estradas, pontes, redes eletrikas no uma sira. Iha estimativa katak maizumenus ema millaun rua mak afetadu no dezlokadu rihun atus ba atus
“Desizaun Governu nian bazeia ba kompromisiu internasional neebe Timor Leste halo iha ambitu Nasoins Unidas no Asosiasaun Nasoins Sudeste Aziatiku (ASEAN), no mos dispozisoins husi Lei Defeza Nasional no Estatutu Organiku F-FDTL nian, neebe fo lejitimidade ba Forsas Armadas hodi partisipa iha misaun umanitaria no emerjensia sira,” haktuir nota komunikadu imprensa neebe STL asesu husi governu, Kinta (06/11/2025).
Konselhu Ministru determina mos inisiu urjente husi prosedimentu konstitusional no legal ba kolokasaun F-FDTL iha misaun neebe temi ona, inklui preparasaun ba regras empenu, iha responsabilidade Ministru Defeza nian, tuir kompromisu internasionál Timor-Leste nian no Estratejia Apoiu Umanitáriu no Emerjensia, neebe aprova iha fulan Janeiru tinan 2025.
Iha ambitu Lei Defeza Nasional nian, envolvimentu no kolokasaun F-FDTL iha operasaun manutensaun pas no apoiu umanitariu sei deside hosi Governu no Prezidente Republika, hafoin konsulta Parlamentu Nasional no Konsellu Superior Defeza no Seguransa.
Aleinde nee Governu Timor Leste liu husi reuniaun Konsellu Ministrus espresa nia profundu solidariedade no kondolensia ba Governu no povu filipinu, relasiona ho estragus makaas neebe kauza husi Tufaun Kalmaegi, neebe hamosu inundasaun makaas, destruisaun no ema mate neebe trajiku iha provinsia sentral sira Republika Filipinas nian, liu-liu iha provinsia Cebu.
Jornalista: Alberto Menezes
Editora: Carme Ximenes
