DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ikus ba prosesu Primeiru Interogatoriu, deside aplika medida Prizaun Preventiva ba arguida ho inisial MF hanesan sidadaun Indonezia.
Tribunal liu husi Juiz Turnu Jose Quintao, halo tiha indentifikasaun ba arguida, no ikus mai deside aplika medida Prizaun Preventiva (PP) ba arguida, hodi asegura arguida ba iha prosesu investigasaun.
Depois Tribunal hasai despaisu, arguida lori kedan ba iha Prizaun.
“Tribunal aplika medida Prizaun Preventiva tanba, faktus neebe Ministeriu Publiku (MP) akuza nee Tribunal sente katak provadu,” dehan Defeza Eustaquio Guterres ba jornalista sira, iha Kaikoli, Dili, Sesta (07/11/2025).
Tuir nia, prosesu nee sei iha faze investigasaun, no arguida hanesan sidadaun Indonezia hela iha Timor familia la iha, tanba nee Tribunal entende se aplika medida Aprezentasaun Periodika difisil uitoan, no hare katak medida neebe adekuadu mak Prizaun Preventiva.
Maibe Ministeriu Publiku (MP) akuza arguida ho krime trafiku umanu, maibe defeza hare katak la iha forsa sufisiente atu reforsa MP nia akuzasaun, tanba arguida ema Indonezia nia konese malu ho ema Timor neebe iha fronteira, sira kontaktu ba malu hodi fo osan empresta ba malu, kontaktu ho mane ida inisial M, sira hasoru malu iha fronteira intelijen mos too.
Ni arguida mos deklara ba iha Tribunal katak, nia mai iha Timor hetan autorizasaun husi militar Indonezia nian, tanba normalmente sira halo hanesan nee, ba ema Indonezia no mos Timor neebe ba hasoru malu ho familia sira sempre husu autorizasaun.
Hanesan defeza la aseita ho desizaun Tribunal nian sei halo rekursu tuir prazu neebe iha. Tanba krimi Trafiku Umanu akuza ba ema neebe hanesan prepara fatin, viola ona vitima balu, maibe arguida ida nee la hatene ema ruma neebe oras nee daudaun deskonfia ba hanesan ema Bangladesh.
Nunee iha alegasaun Prokurador husu atu aplika medida Prizaun Preventiva, tanba konsidera nia sidadaun Indonezia bele desvia an, no bele difikulta tan servisu investigasaun. Maibe tuir defeza iha alegasaun, husu atu aplika medida Aprezentasaun Periodika (AP), lae kordena ho Embaxador atu arguida hein la iha neebe hodi hein investigasaun, maibe Tribunal nia hanoin la hanesan hodi aplika Medida Prizaun Preventiva.
Prosesu nee prezide husi Juiz turnu Jose Quintão, MP reprezenta husi Prokurador, Domingos Gouveia, arguida hetan asistensia legal husi Defensor Publiku, Eustaquio Guterres.
Jornalista: Terezinha De Deus
Editora: Carme Ximenes
