DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial MdCQ, tanba komete krimi hasoru lezada ho inisial EdJ.
Prosesu ida nee lezada iha ona Australi, tanba nee Tribunal deside hodi rona deklarasaun husi arguidu nian.
Iha sala julgamentu laran arguidu deklara katak, momentu sira deskuti malu, arguidu la halo agresaun barak ba lezada, maibe arguidu basa dala ida deit ba iha lezada nia hasan.
Arguidu deklara, depois de akontes tiha problema, lezada maka manda mensajem ba arguidu hodi hateten katak, lezada lakohi ona arguidu.
Arguidu reforsa, haree tiha mensajem ida nee, arguidu tenta telefone ba lezada ho dala barak, maibe lezada la atende telefone. No oras nee dadaun lezada servisu iha Australia, sira hela fahe malu.
Rona tiha arguidu, Tribunal husu ba iha Ministeriu Publiku (MP) atu tama kedan ba iha alegasaun.
Iha alegasaun nee Ministeriu Publiku reprezenta husi Prokurador Hernani Rangel, husu Tribunal atu aplika pena multa ba arguidu.
Enkuantu Defeza Juvinal Dias, husu Tribunal tetu sirkunstansia hotu, atu aplika pena neebe justu ba arguidu.
Rona tiha alegasaun, Tribunal adia ba loron seluk hodi rona desizaun.
Tuir akuzasaun katak, iha loron 14 fulan Febereiru 2025, iha Hera, Dili, (iha oras O8h) dadersan, momentu neeba lezada ba visita sira nia oan no atu lori fali tabarik sira mai halimar iha Dili, maibe entre lezada ho arguidu diskote malu tan iha momentu neeba.
Ho nunee arguidu ho nervozu uza liman hodi basa kedas dala rua iha lezada nia matan fukun kauza bubu metan tiha, hafoin kontinua uja liman hodi tuku tan dala ida iha lesada nia ibun kulit kauza kanek no nakles halo mos ran sai barak iha momentu neeba.
Motivu husi problema nee, tanba arguidu deskonfia lezada iha amante ho mane seluk bainhira lezada sei servisu iha Australia.
Konsekuensia husi arguidu nia hahalok nee maka kalo lezada sinte moras, metan iha matan fukun no kanek tha ibun kulit tanba hetan basa ho tuku husi arguidu, hafoin lezada ba halo tratamentu iha Pradet.
Tanba nee, akuza arguidu hanesan autor material ba krime Violensia Domestika, ho forma ofensa Integridade Fisika Simples, previstu iha artigu 145 husi Kodigu Penal.
Audensia julgamentu nee, prezide husi Juiz Fransisca Cabral, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku, Juvinal Dias.
Jornalista: Terezinha De Deus
Editora: Carme Ximenes
