DILI, STLTIMORLESTE.com – Planu asaun nasional ba igualdade nia implementasaun iha faze daruak remata iha 2021 no agora ba faze da tolu, tuir SEI nia haree 33% feto no labarik iha esperiensia moris hela iha violensia ho tipu oin-oin.
Kestaun nee hatoo husi Diretor Nasional Politika Igualdade Jeneru SEI, Abilio Barreto liu husi nia aprezentasaun iha Palasiu Prezidensia Nicolau Lobato, Bairo Pite, Kinta (06/11/2025).
Nia hatete, planu asaun nasional igualdade jeneru nia implementasaun ida faze daruak nee remata 2021, agora iha faze datolu.
” Iha faze datolu nee ita hahu aranka ho 33% feto ho labarik feto iha esperensia moris hela iha violensia oin oin, tanba nee mak iha implementasaun planu asaun nasional violensia bazeia ba jeneru nee ita mai ho mandatu tinan 10 para atu kontribui oinsa bele redus forma sira husi violensia bazeia ba jeneru inklui violensia domestika nee rasik,” dehan Diretor Nasional SEI nee.
Nia hatete, Xefe Kaza Sivil mos aprezenta kona-ba lei numeru 7/2010 nee koalia konaba lei kontra violensia domestika nee promulga husi Prezidente Republika Jose Ramos Horta iha primeiru mandatu.
“Para atu halo saida para atu asegura ema sira neebe gosta halo krime ka violensia iha uma laran, entau lei kontra violensia domestika ninia objetivu prinsipal iha buat tolu ida mak atu kondena aggressor sira ka ema sira gosta halo violensia iha uma laran, no ida mak atu proteze uma sira livre husi violensia nee rasik, no ida mak atu fo apoiu ba vitima sobrevivente husi violensia domestika ka violensia bazeia ba jeneru,” katak nia.
Nia hatete, dala barak sira ba halo sosializa too iha baze sira no ba iha Ministeriu sira nomos entidade balun, no ema balun dehan lei nee iha atu fahe ema, maibe lolos nee lei nee iha laos atu fahe ema maibe atu proteje, kondena, no atu fo apoiu ba vitima no sobrevivente sira husi violensia bazeia ba jeneru.
Nunee mos planu asaun nasional rezulusaun 1325 nee koalia konaba feto pas no seguransa, no dala barak atividade nee foka barak liu serbisu barak liu ho instituisaun PNTL no F-FDTL no atividade barak liu implementa iha area fronteira sira ho indonezia hanesan iha Oekusi, Bobonaro inklui Kovalima, tanba sira iha posiblidade risku boot tebes, no risku mak bele involve partisipasaun feto sira nia iha prosesu harii pas no dame.
Nunee mos Xefe Kaza Sivil Prezidensia Republika, Jesuina Maria Ferreira Gomes hatutan, koalia konaba violensia domestika konsagra ona iha lei numeru 7/2010.
Aleinde ida nee, iha lejizlasaun espesifika neebe espesialmente proteje feto no mane sira husi violensia domestika porezemplu, lei kontra violensia domestika (Lei N.º 7/2010) no estratejia nasional sira ba igualdade jeneru.
Jornalista: Emerenciana Pinto
Editora: Domingas Gomes
