DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ikus ba prosesu primeiru interogatoriu, deside aplika medida Prizaun Preventiva ba arguidu nain 3 ho inisial VS, SRM no YGKS.
Arguidu nain 3 lori mai iha Tribunal, no parte Ministeriu Publiku (MP) promove sira nain 3 ho krimi Furtu Agravadu neebe previstu iha artigu 252 husi Kodigu Penal.
Rona tiha arguidu nain 3, ikus mai Juiz turnu Jose Quintao deside hodi aplika medida Prizaun Preventiva ba arguidu sira, tanba konsidera iha indisus forte kona-ba krimi Furtu Agravadu.
Hafoin Juiz prosesu deside despaisu, hasai kedan mandadu kondusaun ba Prizaun.
Prosesu nee prezide husi Juiz Turnu Jose Quintao, MP reprezenta husi Prokurador Jose do Rego, arguidu nain tolu hetan asistensia legal husi Defensor Publiku Joao de Carvalho.
Tuir kronolojia katak, Ekipa Aranha husi Servisu Informasaun Polisia Nasional (SIPN) junta Forsa Polisia asegura joven mane nain 3, tanba envolve kazu naok telefone iha loja Jaco Store iha area Suku Fatuhada, Postu Administrativu Dom Aleixo, Munisipiu Dili.
Kazu nee akontese iha loron Segunda dader 03 fulan Novembru 2025, haleu tuku 4 madrugada, wainhira nain ba loja hamutuk hela ho familia hodi selebra loron finadu nian.
Suspeitu sira kaptura iha fatin neebe la hanesan, suspeitu VS konsege kaptura fila fali ho evidensia telefone iPhone hamutuk 5 neebe subar hela iha kama okos.
Suspeitu YGKS kaptura ho evidensia telefone Iphone hamutuk 2. No supeitu SRM kaptura ho evidensia telefone iPhone hamutuk 3. No arguidu sira nia aktu nee deteta husi CCTV neebe instala iha loja laran.
Jornalista: Terezinha De Deus
Editora: Carme Ximenes
