DILI, STLTIMORLESTE.com – Ministru Administrasaun Estatal (MAE), Tomas do Rosario Cabral relata preparasaun komemorasaun 28 Novembru ba Prezidente Republika (PR), Jose Ramos Horta.
Bainhira remata hasoru malu, Ministru Administrasaun Estatal Tomas do Rosario Cabral ba jornalista sira iha Palasiu Prezidensial Nicolau Lobato, Bairo Pite Sesta (07/11/2025) hatete, enkontru ho Prezidente Republika sobre komemorasaun 28 Novembru neebe komemora ba tinan 50 restaurasaun indepedensia Timor Leste nia.
Ministru Estatal hatete, komemorasaun sei halao iha teritoriu Timor laran tomak no Munisipiu Dili halo rasik no Governu sentral nian sei halo serimonia hasae bandeira iha Palasiu Governu, tanba fatin proklamasaun iha neeba no serimonia espozisaun feira no festa kultural sei halao hotu iha Tasi-Tolu hahu iha dia 24 no 29 mak halo enseramentu. No Munisipiu sira hahu no ensera iha 28 depois mai Dili hodi ensera iha 29.
“Iha Palasiu Governu iha serimonia hasae bandeira iha konvidadus barak, ita hein konfirmasaun, tanba Munisipiu sira mos komemora hela sira nia serimonia depois hasae tiha bandeira ho Forsa Defeza Timor Leste nia sei prepara buat ruma atu fo ba komunidade sira neebe mak marka prezensa iha neeba, tanba Munisipiu barak dook, ami rekolha ho Sekretariu Estadu Arte no Kultura ho Sekretariu Estadu Dezenvolvimentu Lokal, ita sei lori mos tebedai mai husi Munisipiu 4 neebe besik mai Dili, depois hasae bandeira hotu tebedai bele animal bele komemora fali tinan 50 ba kotuk ho sira neebe fo vida hodi lori ita ba ukun rasik aan,” dehan Ministru.
Ministru Estatal hatete, ohin mai hasoru Prezidente Republika hodi update preparasaun hotu ba Xefe Estadu.
“Tanba nee mai konfirma no update fali ba Prezidente Republika ba konvidadus sira neebe sei marka prezensa ba serimonia ida nee, no serimonia nee sei halo nivel postu administrativu iha teritoriu nasional tomak,” katak nia.
Nia hatete, konvite ba ona konvidadus hodi hein deit pronunsia bainhira mak sira hatoo fali rezultadu, ajenda haruka hotu ona no Governu mos halo kontaktu ho Embaixada TL iha rai liur.
‘Konvidados de ondra Prezidente sujere dehan katak sebele Governu haree tok SBY tanba uluk iha ligasaun diak ho ita maibe ita tenke hein liu husi kanal no ministeriu negosiu entranjeiru ita haruka ba embaixada sira, no embaixada sira konfirma se mak atu mai, parlamentu mos konvida nia maluk sira mais ita seidauk hetan afirmasaun, ita rona deit mak konfirmasaun husi rai rua Indonezia ho Portugal mais ita hein nafatin konfirmasaun ba chegada delgasaun sira nee,” katak nia.
Orsamentu ba alokasaun komemorasaun 28 Novembru hira? Hatan ba kestaun nee Ministru hatete, orsamentu ba husu iha neeba, no estadu nee iha funsionamentu estadu, no komemorasaun sira nee mai kedas husi 20 Maiu no seidauk hatene bainaka nee hira tau iha neebe no Prezidente sujere balun ba iha Hotel Timor no seluk tan, ida nee presiza haree.
“Ita fokus lai ba komemorasaun nee tanba 50 anos nee laos hau nia ita hotu nia neebe ita fokus,” katak nia.
Nia hatete, parlamentu mak konvida parlamentu husi Portugal atu mai no indonezia seidauk dehan atu mai, no sira mos kontaktu ba Ministru iha Portugal liu husi Embaixada TL, atu membru Portugues ida mai tanba konstrusaun ida santa Kruz oin nee Portugues sira malu sira sei entrega iha dia 14 hein tok karik resposta ema ruma mai karik inagura fatin neeba depois sei entrega ba administrasaun Munisipiu Dili hodi halo jestaun.
Iha biban nee Prezidente Republika Jose Ramos Horta husu atu fo rekonhesimentu ba Antonio Guterres no Ministru sei informa fali ba Primeiru Ministru.
Jornalista: Emerenciana Pinto
Editor: Xisto Mendonça
