DILI, STLTIMORLESTE.com – Prezidente Republika (PR), Jose Ramos Horta hatete, nia simu ona lista indultu husi Governu liu husi Ministeriu Justisa atu fo indultu ba prizioneiru, maibe la inklui Padre Richard Dascbach.
Prezidente Republika Jose Ramos Horta hatoo kestaun nee ba jornalista sira, bainhira remata vizita Eskola Z&Z Internasional eschool iha Bebonok, Sesta (07/11/2025).
PR hatete, nia simu ona lista prizineiru sira atu hetan indultu iha 28 Novembru, maibe la inklui Padre.
“Hau simu ona proposal rekomendasaun mai husi Ministeriu Justisa, mai husi sistema priozional maibe seidauk halo desizaun,” dehan Prezidente Republika.
Prezidente Republika hatete, iha loron Kinta nee simu ona lista prizioneiru neebe atu hetan indultu husi Governu liu husi Ministeriu Justisa atu hetan indultu iha 28 Novembru, maibe too agora seidauk iha desizaun.
Lista indultu neebe Prezidente simu total nain hira? hatan ba kestaun nee Prezidente Republika hatete, total ema nain 4 ka 6 hanesan nee.
“Inklui feto, laiha kazu neebe violensia seksual, laiha kazu omisidiu agravadu, ida nee laiha indultu ba sira,” dehan Prezidente Republika.
Karik iha lista neebe Prezidente Republika simu husi Governu liu husi Ministeriu Justisa inklui mos Padre Richard Dascbach ka lae? Hatan ba kestaun nee Prezidente hatete, la simu naran padre nia husi Governu. “Nee hau la simu naran husi Governu laiha naran iha lista,” dehan Prezidente Republika.
Aleinde nee Prezidente Republika nuudar Komandante Supremu oinsa ita nia haree kona-ba aktu husi membru F-FDTL balun neebe halo agreasaun fiziku hasoru sidadaun, hanesan kazu foin lalais akontese iha Bobonaro, hatan ba kestaun nee Prezidente hatete, Prezidente rasik seidauk koalia ho Komandante F-FDTL no seidauk simu relatoriu ruma kona-ba asidente nee, tanba akontese nee nia labele fo komentariu.
Jornalista: Emerenciana Pinto
Editor: Xisto Mendonça
