DILI, STLTIMORLESTE.com – Eis Dekanu Fakuldade Agrikultura Universidade Oriental Timor Lorosae (UNITAL), Heribertus A. Colo husu governu iha Orsamentu Jeral Estadu (OJE) 2026 nian tau osan boot iha setor agrikultura, hasae produsaun no garantia seguransa alimentar iha rai laran.
Nia dehan, dezenvolvimentu setor agrikultura iha nasaun ida importante tebes. Koalia kona-ba dezenvolvimentu iha setor agrikultura hanesan prosesu estratejia neebe atu hasae produsaun ba moris povu agrikultor no dezenvolvimentu iha aspeitu sosiu ekonomia sustentabilidade, tantu liu husi teknolojia no partisipasaun povu em jeral.
Objetivu espesifiku husi dezenvovimentu agrikultura atu hasae no garantia siguransa alimentar iha rai laran, ho dalan atu garantia nesesidade alimentar nasional no nutrisaun povu nian.
“Hau temi iha leten atu hetan lalais presiza investimentu estadu no governu liu husi OJE 2026 hanesan tuir mai nee, ida dezenvolvimentu iha area irigasaun, rua preparasaun fini nebe diak, tolu fasilidade agrikultura, haat treinamentu no formasaun ba agrikultor sira, lima kreditu ba agrikultor ho fasil no lalais. Hirak neebe ita mensiona iha leten presiza atensaun husi OJE 2026 neebe investe iha setor agrikultura ho montante 10%, wainhira ita kompara OJE 2025 investimentu iha dezenvolvimentu seitor agrikultura hetan 2%, ho ida nee mehi atau garantia independensia siguransa alimentar susar atu hetan tarjetus, nunee hakarak ka lakoi OJE 2026 ba seitor dezenvolvimentu agrikultura nee presiza osan boot duni, maibe depende ba governu no politik nain sira iha parlamentu,” hatete Heribertus A. Colo ba STL iha Kampus UNITAL Becora, Sabadu (8/11/2025).
Nia afirma, dezenvolvimentu lao duni hanesan dezenvolvimentu iha seitor infraestrutura dalan, maibe seitor seluk hanesan seitor agrikultura hakdasak, maibe optimista ba lideransa PM iha IX governu ida nee atu rezolve problema iha seitor agrikultura.
Tanba nee hakarak ka lakohi governu tenke tau orsamentu neebe boot iha OJE 2026, hodi nunee too tempu ida labele importa aihan sira husi rai liur, rekonhese katak TL adapta merkadu livre fo dalan ba nasaun hotu atu halo kompetisaun iha área merkadu, maibe presiza simples ida oinsa prepara kondisaun neebe diak hodi kompete iha area merkadu internasional parte ida mak setor agrikultura.
Jornalista: Joaninha Belo
Editor: Domingas Gomes
