BAUKAU, STLTIMORLESTE.com – Familia neebe simu ona sakramentu matrimoniu, nee sakramentu santifikadu ba ema nia moris iha mundu, liu husi buat neebe Maromak tau hamutuk no laiha ema ida atu bele haketak.
Kestaun nee hatoo husi, Padre Manuel da Silva Ximenes ba STL iha kapela Liasidi, Sabadu (09/11/2025) hatete, familia neebe simu ona sakramentu matrimoniu iha igreja presiza fiel ba m alu nafatin, tanba buat neebe Maromak kesi hamutuk ona laiha ema ida bele hafahe.
“Tuir sakramentu matrimonia tuir ita nia fiar kreda Katolika sakramentu nee santifikadu, santifika ema nia moris iha mundu tanba nee mak sakramentu ida nee tulun ema atu moris iha santa sagra santidade,” dehan Padre Manuel.
Padre nee hatutan, uma kreda kuandu selebra sakramentu matrimonia dehan katak, buat neebe mak Maromak tau hamutuk labele haketak nee laiha ema haketak ema nain rua, neebe tau hamutuk ona sira nain rua hadomi malu too mate tuir juramentu neebe sira halo.
Kuandu infidelidade nee dehan katak, sira lakon sira nia orasaun ba malu, vokasaun hotu hotu tenke fiel bainhira sira nia komunhao ho Maromak.
“Neebe hau konvida sira neebe simu ona sakramentu matrimoniu labekle hases aan husi Maromak, no Maromak neebe ita fiar mak husi Sakramentu neebe Jesus husik hela ba ita,” dehan Padre nee.
Nunee mos Bispu Dioseze Baukau, Dom Leandro Maria Alves hatutan, buka fo sasin ba Kristu liu husi domin, nunee mos ba sira neebe mak simu sakramentu kaben nee Maromak bolu atu hadomi malu, koinese malu tanba feen ho laen dehan hadomi.
“Nee duni laiha tan liafuan seluk iha deit mak liafuan domin, buka sai inan ho aman sai Naroman ba oan sira hatudu mos domin ba oan sira hatudu dalan domin nia liu husi dalan hadomi malu, akompanha malu iha vida tomak too mate,” dehan Dom Leandro.
Iha biban nee Dom Leandro husu nafatin ba sarani sira nafatin reza hodi husu nain Maromak nia grasa, nai Maromak nia tulun atu akompanha familia ida idak sai sai sasin Jesus Kristu nian iha sira nia moris loron loron nia liu husi hahalok diak sira, hahalok domin, hadomi malu.
Jornalista: Emerenciana Pinto
Editora: Carme Ximenes
