DILI, STLTIMORLESTE.com – Ministeriu Edukasaun (ME) rekonhese oras nee daudaun eskola sekundariu sei ezekuta hela konsesaun eskolar, maibe husu bainhira remata tenke submete relatoriu ba ministeriu.
Diretor Nasional Ensinu Sekundariu iha ME, Benjamin Gomes da Cruz Fernandes dehan, konaba rezultadu konsesaun eskolar nee too agora eskola sira seidauk hatama relatoriu mai, tanba sira sei ezekuta hela konsesaun.
“Hau hanoin konaba rezultadu konsesaun eskolar nee ita nian eskola sira seidauk hatama mai, tanba sira sei ezekuta hela konsesaun nee. Dia 15 fulan Dezembru ba leten sira foin hatama relatoriu mai ami. Nee duni relatoriu terseiru no quadro trimestre nee seidauk simu, tanba ita nian eskola sira foin mak simu osan no dadaun nee ninia ezekusaun ba konsesaun lao hela,” dehan nia ba STL, Segunda (10/11/2025).
Benjamin hatutan, nee duni husu eskola sira too fim de Dezembru nee tenke hatama relatoriu mai iha Ministeriu, bainhira eskola sira la hatama relatóriu maka sei afeita ba sira nian konsesaun iha faze tuir mai.
Iha fatin seluk Diretor Eskola Sekundariu Jeral nu. 4 Setembru Balide, Sergio A. da Cruz haktuir, depende ba ministeriu husu sira bele submete ona sira nian relatoriu ida nee, tanba ninia ezekusaun ba osan ida nee ezekuta tuir nesesidade eskola nian presiza.
Jornalista: Jacinta Sequeira
Editora: Domingas Gomes
