DILI, STLTIMORLESTE.com – Moris hasoru problema iha estudu ka iha uma, diak liu koalia ho Maromak iha uma orasaun hodi hatoo ba Jesus.
Kestaun nee hatoo husi Joven ba Kristu, Rofina Soares ba STL, Tersa (11/11/2025) hatete, moris iha mundu sempre hasoru problema, liu liu iha eskola fatin buat oin oin no iha uma mos hasoru problema, maibe buat neebe hasoru diak liu hatoo ba Jesus iha uma orasaun.
“Igreza sai fatin uma orasaun ema bele kontaktu ho Maromak, hodi koalia saida mak iha nia moris, bainhira ita hatoo ho fuan laran fiar ba katak ita sei hetan grasa no Maromak bele rejolve problema neebe ita hasoru,” dehan Rofina.
Nia husu ba foinsae ka inan aman sira nafatin hakbesik aan ba Igreza, hodi rona Maromak nia liafuan sira, no bele hatoo problema hotu ho Maromak.
Nunee mos Padre Richardo Pasang SVD hatete, leitura evanjelhu (João 2:13-22) Jesus duni sai komersiante sira husi templu laos tanba odiu, maibe tanba domin no hakarak atu restaura Ninia santidade. Signifikadu katak tenke hamoos fuan husi preokupasaun mundanu sira, kaan-teen, no sala sira atu nunee sira sai hela-fatin neebe diak ba Maromak.
“Mensajen xave, ita-nia isin mak Maromak nia templu loloos no tenke respeita. Jesus nia moris hias mak ita nia garantia katak ita sei laos deit moris iha mundu nee maibe mos hetan moris rohan laek. Ita presiza hamoos beibeik ita-nia fuan atu nunee Maromak bele hela iha sira-nia laran. Aplikasaun: Reflete kona-ba buat hotu neebe “baruk” iha ita-boot nia fuan, hanesan ambisaun, ansiedade, ka imajen dijitál sira. Husu ba Maromak atu hamoos ita-boot nia fuan no tulun ita-boot atu moris ho laran-moos iha domin. Simu Jesus nuudar dalan moris-hias nian neebe sei harii fali ita-boot nia fuan loron-loron ho domin no lia-loos,” dehan Padre Richardo.
Nunee mos Bispu Dioseze Baucau, Dom Leandro Maria Alve hatete, Igreza mak fatin neebe ema hasoru malu ho Maromak.
“Agradese ba Maromak, ita nia hamutuk nee hanesan grasa ida Nain Maromak mak bolu ita halibur ita iha fatin ida nee, iha uma ida nee, uma ida nee hanesan sai uma orasaun nia, fatin ida neebe mak ita hotu hotu halibur hamutuk atu rona Maromak nia futar liafuan, fatin neebe mak ita halibur kompartila ba malu buat neebe nau Maromak haraik mai ita iha ita nia moris loron loron nia, uma orasaun ida nee halibur ita,” dehan Dom Leandro.
Dom Leandto dehan, Igreja mak halo ema barak konhese ho Maromak, tanba nee ohin loron sarani barak husi fatin fatin koinese Maromak liu husi uma orasaun, no simu batismo iha kapela.
Kapela ka Igreja sai hanesan fatin fira nia, Moises ho Abrao lao iha fatin neebe sira hatene ho fiar sira hasoru malu ho Maromak hodi halo orasaun hodi agradese, tanba nee nuudar sarani fiar nain sente katak Igreza mak marka fiar nia, tanba nee halo uma orasaun atu ema bele agradese ba Maromak no bele rekonhese kona-ba nai Maromak nia prezensa iha ema nia aan.
“Uma orasaun sai fatin enkontru entre ema ho ema no ema ho Maromak tanba nee Maromak bolu ema mai halibur hamutuk atu bele koinese malu no koalia ba malu, atu ita neebe koinese malu nee sai familia Maromak nia, nee duni Maromak bolu ita mai haree malu hodi hadomi malu koinese malu hodi hadomi malu, Nain Maromak la bolu ita mai iha uma orasaun atu baku malu fali duni malu fali estraga malu lae, maibe Maromak bolu ita mai hamutuk iha nee atu halo ita sira nee haree malu hanesan maun ho alin, ita sira nee hotu mesak maun ho alin,” dehan Bispu.
Bibi Atan kreda Katolika dehan uma orasaun nee hanesan uma halibur, uma neebe halibur nia oan sira hotu neebe fiar iha Maromak hanesan aman. Hanesan iha leitura hatete Maromak o sai Naroman ba nasaun hotu hotu atu hau nia maksoin too mai.
Jornalista: Emerenciana Pinto
Editora: Carme Ximenes
