DILI, STLTIMORLESTE.com – Ema neebe moris iha lealdade no fiar nain sei hetan rekompensa boot husi Nai Maromak, tanba nee ema presiza moris tuir Jesus nia hanorin.
Kestaun nee hatoo husi Padre Richardo Pasang SVD, liu husi refleksaun loron Tersa (11/11/2025) hatete, leitura ohin loron koaliua konaba fiar nain, no ema neebe fiar nain, no fiel sei hetan rekompensa boot.
“Leitura sira ohin nian, 11 Novembru 2025, koalia mai ita ho tema lealdade no servisu desinteresadu, neebe sublina tantu iha leitura dahuluk (Livru Sabedoria nian) no leitura evanjelhu nian (Lc 17,7-10),” dehan Padre Richardo.
Leitura dahuluk tuir Padre Richardi koalia kona-ba oinsa ema fiar-nain sira sei hetan rekompensa boot maski hetan koko, enkuantu evanjelhu hanorin katak atan ida labele hein hahii hafoin serbí nia nain, tanba buat hotu mak prezente husi Maromak.
No leitura rua ba loron Tersa koalia makaas kona-ba importansia oinsa bele moris iha leaddade no halao serbisu hotu ho sinseru.
“Leitura rua nee sublina importansia husi lealdade no servisu sinseru. Leitura dahuluk (Livru Matenek) Deskreve ema fiar-nain nuudar ema neebe hetan koko hanesan osan-mean iha ahi laran maibe sei hetan rekompensa boot. Ida nee hatudu katak laran-metin lori rekompensa rohan-laek,” dehan nia.
Nia hatutan, leitura evanjellu nian reprezenta atan ida neebe fiel no obediente laho ezije rekompensa ka gratidaun.
Ida-nee hanorin katak servisu loloos maka espresaun ida haraik-an nian no konxiensia katak buat hotu neebe ema ida iha maka prezente ida hosi Maromak.
“Ohin maka nemorial Saun Martinho de Tours nian, neebe mos konhesidu nuudar atan fiel no modelu ba bibi-atan sira,” katak Padre nee.
Iha biban nee Padre husu ema hotu nuudar sarani nafatin moris tuir buat neebe Nain Maromak hanorin neebe hakerek ona iha eskitura ho Biblia liu husi evanjelhu, nunee fiel obidiente, tanba hahalok diak tomak neebe halo sei hetan grasa husi Maromak.
Jornalista: Emerenciana Pinto
Editora: Carme Ximenes
