DILI, STLTIMORLESTE.com – Ministeriu Publiku (MP) kontinua mantein alegasaun ba kazu Alcino de Olivera Guterres, neebe mate iha Likisa.
Prosesu refere antes nee alegasaun tiha ona, depois Tribunal desidi hodi halo inspesaun ba iha lokal de krime. Depois inspesaun remata, Tribunal husu atu Ministeriu Publiku (MP), no mos Defeza atu tama ba iha alegasaun foun.
Iha alegasaun nee MP neebe reprezenta husi Prokurador, Nelson Magno deklara katak, nia parte mantein ho alegasaun anterior, husu Tribunal atu fo pena prizaun tinan 25 kada arguidu. No Defeza reprezenta husi Advogadu Privadu, Marinho da Cruz deklara katak, nia parte konsidera la iha indisus forte, tanba nee husu atu Tribunal absolve arguidu nain rua husi krime neebe MP akuza ba.
Rona tiha ida nee, Tribunal adia ba loron seluk hodi rona desizaun.
Antes nee iha alegasaun anterior Ministeriu Publiku solisita ba iha Tribunal Kolektivu atu kondena arguidu nain rua ho inisial LdOG hanesan oan no DdO hanesan aman, tanba konsidera provadu ba iha krime hasoru matebian Alcino de Oliveira Guterres.
Iha alegasaun nee Prokurador deklara katak, mantein ho akuzasaun neebe iha, tanba nee solisita ba iha Tribunal Kolektivu atu kondena arguidu nain rua ho pena prizaun.
MP solisita ba Tribunal, atu kondena arguidu nain rua, ba arguidu LdOG ho pena prizaun tinan 25, no arguidu DdO ho pena prizaun tinan 25.
Aleinde nee, Defeza husi arguidu sira nian, solisita ba iha Tribunal kolektivu, atu tetu sirkunstansia hotu, hodi aplika justisa neebe justu ba arguidu nain rua.
Tuir faktus katak, matebian Alcino de Oliveira Guterres ho arguidu LdOG no arguidu DdO, hanesan avo no tiun hela hamutuk iha uma ida sira hela iha aldeia Ergoa, suku Loerema, Posto Administrativu Bazartete, Munisipiu Liquisa.
Iha loron 2 fulan Novembru tinan 2024, haleu oras tuku 18h00 otl, arguidu LdOG bolu matebian Alcino de O. Guterres, atu haruka ba sosa mina Bimoli iha kiosque, maibe matebian rezeita, nune arguidu LdOG foti fatuk ida hodi tuda matebian dala ida atinji iha ulun, halo matebian hakilar dala ida no monu tun kedas ba rai no mate iha fatin.
Haree matebian latan hela no mate ona arguidu LdOG halai ba bolu nia aman arguidu DdO, too mai sira nain rua foti matebian hodi ba hatoba hela iha kama neebe halo hodi au.
Tuir mai arguidu DdO foti tali ida iha dapur laran hodi kesi iha matebian nia kakorok, tuir mai arguidu nain rua foti matebian hodi ba tara iha ai apokat hun ida neebe besik iha uma sorin.
Arguidu sira halo ho livre, deliberada e konscientemente, msira hatene katak tuda hodi fatuk kesi hodi tali tara iha ai ho nia karakteristikas, hanesan instrumentu neebe apto hodi provoka hamate lesadu hahalok nee halo vontade rasik.
Konforme relatoriu autopsia katak causas de muerte (Asfia mecanica debido a Ahorcamento con soga) maneira mate tan Homicidio ou hetan oho husi arguidus sira depois de tuda hodi fatuk halo nia monu kedas iha fatin, ho tuir mai kesi iha kakorok hodi tara ba avokati hun hodi hatuda katak, ninia mate kausa husi nia rasik mak oho ho maneira taraan.
Nunee Konstitui arguidus sira LdOG, no DdO, hanesan autoria material ho forma konsumada ba krime Homisidio Agravadu.
Audensia julgamentu nee, prezide husi Juiz Kolektivu, Jose Escurial, Jumiati Freitas, Fransisca Cabral, Ministeriu Publiku reprezenta husi Prokurador nain ida, arguidu hetan asistensia legal husi Advogadu Privadu, Marinho da Cruz.
Jornalista: Terezinha De Deus
Editora: Carme Ximenes
