DILI, STLTIMORLESTE.com – Forsa Austrália liu husi Programa Kooperasaun Defeza (DCP), ofisialmente entrega kazerna 2 no toilet ida ba Komponente Navál.
Komandante Komponente Naval FALINTIL-Forsa Defeza Timor Leste (F-FDTL), Komodoro Higino das Neves dehan, fasilidade sira nee militár Australia mak konstruliu liu husi ezersisiu harii hamutuk iha Julhu tinan nee no konstrui husi empreza Austrália RMS.
Nia esplika, kazerna rua nee sei fasilita militár komponente navál hodi halo servisu militár nian. Hanesan Komandante Komponente Navál sente kontetente, tanba liu husi kooperasaun militár neebe mak iha liliu ezersisu konjunta harii hamutuk 2025 konsege konstrui tán fasilidade balun ba forsa armada Timor Leste liu-liu Komponente Navál.
“Hau haharak hatoo hau nia agradesimentu ba Governu Australia liu husi Programa Kooperasaun Militar nian neebe ohin entrega fasilidade balun tan mai Komponente Navál. Ida nee simboliza hametin liutan kooperasaun neebe mak iha,” hatete Komandante Komponente Naval F-FDTL, Komodoro Higino das Neve, liu husi nia diskursu iha Komponente Naval Hera, Segunda (10/11/2025).
Iha fatin hanesan Adidu Defeza ba Timor-Leste Kapitaun Mar e Gerra Matthew Ricardson hateten, Austrália komprometidu kontinua apoia Timor-Leste ba iha setór defeza no área sira seluk.
“Ami nia hakarak ba Timor Leste mak sai forti, prosperu no rezilente liu, ami rekonese liu tantu Austrália no Timor Leste buka atu konstribui nafatin hodi hatan ba dezafiu sira seguransa iha Timor no rejiaun realtivamente iha maritima,” nia afirma.
Jornalista: Jeniche da Costa
Editora: Domingas Gomes
