DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun, deside kondena arguidu nain tolu (3) ho inisial ER, MMO no AM pena prizaun tinan 5, tanba komete kazu naok sasan iha Loja Xina.
Iha desizaun nee Tribunal Koletivu deside aplika pena prizaun tinan 5 efetivu ba arguidu ET no MMO, ba arguidu AM Tribunal deside aplika pena efetivu tinan 5 fulan 6 prizaun.
Tribunal aplika pena refere tanba konsidera iha faktus provadus kona-ba krimi neebe Ministeriu Publiku akuza ba arguidu nain tolu.
Tribunal mos husu atu parte Ministeriu Publiku no defeza la konkorda ho desizaun Tribunal nian, bele halo rekursu tuir prazu neebe iha.
Antes nee Ministeriu Publiku iha alegasaun final ba krimi Furtu Agravadu, Arma Branka no Roubo, solisita ba iha Tribunal Koletivu atu kondena arguidu ET, MMO no AM ho pena prizaun 10.
Iha alegasaun nee, Prokurador Domingos Barreto deklara katak, arguidu nain tolu konfesa ba faktus neebe konsta iha akuzasaun.
Prokurador ba prosesu deklara, arguidu nain tolu prienxe hotu ba krimi tolu neebe iha, no aktu neebe arguidu sira halo tama iha Loja rua.
Nunee Prokurador mantein ho akuzasaun neebe iha, konsidera katak faktus neebe konsta iha akuzasaun provadu bazeia ba deklarasaun husi arguidu no reforsa tan husi sasin sira neebe arola.
Tanba nee Ministeriu Publiku solisita ba iha Tribunal Koletivu atu kondena arguidu nain tolu, no kada arguidu ida hetan prizaun tinan 10.
Enkuantu husi parte defeza, Advogadu Privadu Manuel Tilman solisita ba iha Tribunal atu tetu sirkunstansia hotu, hodi bele aplika justisa neebe justu ba iha arguidu nain tolu.
Iha faktus sufisiente katak, iha loron 25 fulan Marsu tinan 2024, haleu oras tuku Hh00 kalan, arguidu ET (kondy) kontaktu via telefone ho arguidu sira MMO no AM, tuir mai tula sira nain rua ho kareta ho marka MAZDA CX7 matrikula A.12-470 TL, hodi lao pasiar iha area Dili laran.
Iha tuku 02h50 arguidu sira diriji ba Loja Wang Jhong sita iha Kanpung Baru Komoro Dili, para tiha kareta iha loja hodi mos save roda ida no safenda ida, tuir mai arguidu SK selok odamatan loja no arguidu nain tolu ajuda hiit sae odamatan ho forsa hodi nakloke, tama ba loja laran hodi foti sasan mak hanesan tuir mai nee.
Osan cast US$ 650,50, Pulsa TT, Telemor, Telkomsel hamutuk folin US$ 300, Tip Telemor tobol 3 hamutuk US$ 36, spiker boot ida folin US$ 38, perfun tolu no kadeli biasa tolu folin US$ 9.00, Besi Gym 2 folin osan US$ 46, brinkus haat no kelu kopu tolu ho folin US$ 17, total montante US$ 127.50.
Tuir mai liu tiha loron 3 iha loron 28 fulan Marsu 2024 haleu oras tuku 02.50 OTL arguidu sira kontaktu malu, sai husi Dili diriji ba Likisa ho kareta Toyota Prado matrikula 23-035 TL neebe hetan aluga husi lezadu Cai, hafoin fo volta iha Dili laran oras hirak nia laran.
Hafoin too iha loja LEADSO nia oin, sira iha Aldeia Leopa, Suku Dato, Munisipiu Likisa, hafoin para kareta arguidu SK mak tun uluk husi kareta, hodi mos safenda ida save roda hodi selok no sobu odamatan, hafoin nakloke arguidu sira nain tolu ajuda hiit sae odamatan.
Tuir mai sira tama ba loja laran, arguidu MMO hahu sobu kamera CCTV no arguidu AM hafuhu ema iha liur, no arguidu SK hahu hakat ba loke gaveta haree osan laiha, arguidu SK obriga sira nain tolu dehan tama deit ba sira nia kuartu hodi fanu deit ona.
Tuir mai arguidu sira idak-idak foti lampada tau ba ulun foti mos katana no sabit iha loja laran hodi uza, sira nain haat diriji ba lezadu nia kuartu hodi futu uluk nia aman lezadu Wang Yong Chao, hotu tiha arguidu MMO hein lezadu no arguidu ET no AM akompanha SK hakat ba lezadu XX nia kuartu, silu nia liman rua ba kotuk, arguidu ET no AM hahu kesi nia liman no ain, tuir mai suspeitu SK se katana hodi husu dehan uang dimana, lezadu hatan dehan osan iha neeba, labele hamate hau.
Tuir mai SK hiit brankas sai husi janela, arguidu nain tolu foti tan sigaru slop 26, tua legend butir hitu (7), butir boot ida, kiik tolu, hamutuk tua butir sanulu (10).
Hafoin hodi brankas, sigaru no tua arguidu sira aranka mai Dili no sira fera brankas nee iha area Ponte Komoro, hodi fahe osan total US$ 5.000 kada ema ida hetan 1.250, nunee mos sasan sira seluk hanesan sigaru no tua.
Konsekuensia husi arguidus sira nia hahalok ba faktus rua nee no maneira lori save roda hodi tama foti ema nia sasan iha loja laran ho maneira selok odamatan no osan iha brankas ho total US$ 5.000 no sasan sira hanesan tua no sigaru iha tempu kalan fo prejuízu ba lezadu sira, ba faktus primeiru ho prejuizu 1.127.50 no faktus segundu prejuizu total US$ 7.000.
Argundus sira mos involve iha kasu registada ho Nuc 0387/2015/DICMR. mic 0369/2021/DICMR, nuc 0748/2018/DICMR.
Arguidus sira halo ho forma livre, deliberada no konsientemente la obsta sira nia komportamentu, hodi aproveita iha tempu kalan para fasil liu hodi selok odamatan tama foti ema nia sasan hodi hetan benefisiu, apesar de hatene muito bem katak konduta nee lei proibe.
Nune konstitui arguidus sira ET, MMO no AM, hanesan autoria material ba krimi rua Furtu Agravadu artigu 253 kodigu Penal.
Audensia julgamentu nee Prezide husi Juiz Koletivu, Arjentino Nunes, Zulmira Auxiladora, Ivan Patrocenio, Ministeriu Publiku reprezenta husi Prokurador Domingos Barreto, arguidu hetan asistensia legal husi Advogadu Privadu Manuel Tilman.
Jornalista: Terezinha De Deus
Editor: Xisto Mendonça
