DILI, STLTIMORLESTE.com – Komunidade Sant Egidio husi Roma (Italia) liu husi Komunidade Sant Egidio Timor Leste neebe lidera husi Olga Teresia Corbafo, fo ona solusaun ka ajuda ba labarik sira neebe laiha sertidaun moris, hodi bele asesu ba tratamentu saude no bolsu estudu, tanba labarik sira neebe tuir eskola dame nian labele asesu ba bolsu estudu no tratamentu saude, tanba sira laiha sertidaun moris.
“Kazu nee ami foin hatene bainhira ami halao atividade eskola dame nian iha Kapela Sao Sebastiao Hudi Laran. Labarik ida ho naran Nelio Mateus de Araujo Soares ho kodisaun moras husi inisiu nia moris mai atu halo tratamentu nia saude hetan difikuldade tanba nia laiha sertidaun moris. Tanba nee, komunidade Sant Egidio buka dalan ka solusaun oinsa mak labarik nee bele hetan sertidaun moris,” katak Cristovorus Kurniawan, Reprezentante Sant Egidio Roma (Italia) ba STL iha Domingu (16/11/2025).
Tuir Cristovorus Kurniawan, sertidaun moris nian hanesan dokumentu ida neebe estabelese katak labarik sira ezisti no tenke hetan sira nia direitu iha sosiedade, tanba sertidaun moris nian mak esensial atu asesu ba kuidadu saude inklui mos asesu ba edukasaun.
“Hau reprezenta komunidade Sant Egidio iha Roma, mai iha nee atu fó solusaun, ikus mai fó dokumentu sira nee. Sertidaun moris nian nee fahe ona ba labarik sira neebe presiza hanesan Nelio Mateus de Araujo Soares. Espera katak ho dokumentu nee, Nelio Mateus de Araujo Soares bele asesu ona ba tratamentu nia saude,” hatete Cristovorus Kurniawan.
Entretantu, Ermelinda de Araujo hanesan inan husi Nelio Mateus de Araujo Soares agradese ba Komunidade Sant Egidio iha Roma no Timor Leste neebe tulun ba nia oan hodi hetan dokumentu sertidaun moris nian.
“Hau kontenti tebes no agradese ba komunidade Sant Egidio neebe tulun ona hau nia oan halo sertidaun moris nian, tanba ho sertidaun moris nian nee mak hau nia oan bele asesu ba tratamentu saude,” hatete Ermelinda.
Nia esplika katak Nelio Mateus de Araujo Soares, nuudar oan dahuluk neebe husi inisiu partus moras kedas (moras fuan), maibe atu tratamentu nia saude hetan difikuldade tanba laiha sertidaun moris.
“Hau nia oan nee moris prematur no husi inisiu hau partus hetan kedas moras fuan. Tanba nee, hau agradese tebes ba komunidade Sant Egidio neebe tulun ona hau nia oan bele hetan sertidaun moris,” katak Ermelinda.
Inan husi oan nain rua nee, simu ona sertidaun moris nian neebe intrega direitamente husi Responsabilidade Eskola Dame iha Dili, Junita Detantri Untung akompanha husi Reprezentante Sant Egidio Roma, Cristovorus Kurniawan no membru Sant Egidio, Napo Mali Tetik.
Nunee mos, Responsabilidade Eskola Dame iha Dili, Junita Detantri Untung hatete nia foin hatene Nelio Mateus de Araujo Soares nia moras iha loron 4 fulan Agostu tinan 2025.
“ Hau hanourin labarik sira iha eskola dame nee hahu iha loron 4 fulan Maiu tinan 2025. Total labarik sira neebe tuir eskola dame nee hamutuk labarik nain 25 inklui Nelio Mateus de Araujo Soares. Labarik sira nee balun eskola ona no balun seidauk eskola. Ami halao eskola dame nee fulan lima ona,” katak Junita.
Nuudar Responsabilidade Eskola Dame iha Dili neebe lokaliza iha Kapela Sao Sebastiao Hudi Laran, foin hatete Nelio Soares nia moras iha loron 4 fulan Agostu tinan 2025.
“Bainhira hau ba Nelio nia uma, nia kondisaun saude ladun diak, isin manas hela. Hau hakuak no kous nia. Nelio nia fuan halai lalais liu. Hau fohatene situasaun saude Nelio Soares nian nee ba Valeria Martona iha Roma. Hau husu nia inan katak Nelio nia moras nee hahu kedan husi nia partus. Hau telefone kedas ba Valeria iha Roma katak atu halo tratamentu Nelio nia saude iha difikuldade tanba Nelio laiha sertidaun moris. Depois vizita nee, hau ho maun Napo sosa paun no susuben lori fo ba Nelio,” tenik Junita.
Junita haktuir katak iha loron 14 fulan Agostu tinan 2025, Leonardo Tranggono husi Roma telefone nia atu haruka nomeru telefone eis Prezidente Tribunal Rekursu, Deolindo dos Santos neebe kolega diak ho Leonardo Tranggono. Liuhosi Deolindo dos Santos telefone Diretor Jeral Servisu Rejistu no Notariadu, Agostinho hodi tulun trata dokumentu sertidaun moris nian ba Nelio Mateus de Araujo Soares.
“Ida nee foin primeira vez Komunidade Sant Egidio fo solusaun ba labarik sira iha eskola dame neebe laiha dokumentu sertidaun moris nian. Depois Nelio hetan sertidaun moris nian nee, ami akompanha nafatin nia moras no asesu ba tratamentu nia saude iha hospital,” dehan Junita.
Nia hatutan tan katak lori naran Komunidade Sant Egidio Timor Leste hatoo agradese ba Valeria Martano no Leonardo Tranggono husi Komunidade Sant Egidio Roma neebe buka dalan solusiona labarik eskola dame, Nelio Soares hetan sertidaun moris nian.
Komunidade Sant Egidio hanesan asosiasaun leigu Katólika ida neebé harii iha tinan 1968 iha Roma, Itália, ho lideransa hosi Andrea Riccardi. Komunidade nee dedika ba servisu sosiál no hetan ona rekoñesimentu husi Kúria Romana Santa Sé nian nuudar asosiasaun internasionál fiar-nain sira-nian. Komunidade foka ba diálogu pasífiku, amizade ho ema kiak sira, no empoderamentu sosiál.
Komunidade Sant Egidio mós ativu iha inisiativa internasionál oioin, inklui enkontru internasionál sira ba dame no diálogu interrelijiozu. Sira iha kompromisu atu hatoo ema nia hakarak ba dame no apoia martir foun sira. Iha Timor Leste, Komunidade Sant Egidio lidera husi Olga Teresia Corbafo.
Jornalista: Mikael Mali Mau
Editor: Mikael Mali Mau
