DILI, STLTIMORLESTE.com – Ohin Ministeriu Publiku (MP) halao destruisaun ba sasan kontra bandu ka material droga ho tipu Cocaina, neebe ho nia todan kilograma 2,094, iha Hospital Nasional Guido Valdadares (HNGV).
“Ohin ita halo destruisaun ba material droga ho nia todan kilograma 2,094, “dehan Prokurador Jeral Republika, Nelson de Carvalho ba jornalista sira, iha HNGV, Segunda (17/11/2025).
Iha fatin hanesan, Adjunta Prokuradora Jeral, no Koordenadora iha Gabinete Sentral Kombate Korrupsaun no Krimi Organizada, Angelinha Joaninha Saldanha dehan, prosesu sei lao hela, tanba nee labele koalia detalhu.
“Ohin ita halo destruisaun ba objetu krime no prosesu ida nee sei lao, ami labele koalia detalhamentu konaba konteudu prosesu, maibe destruisaun ba prosesu ida nee tanba barak, ita bele dehan ema fan karik osan hira maka tama,” dehan nia.
Nia hatutan, kolaborasaun husi parte hotu nian, konsege kaer arguidu sira no oras nee dadaun sira iha Prizaun Preventiva no sidadaun estranjeiru, sira hatama husi nasaun Fransa tama mai iha Timor.
Aleinde nee, Prokuradora Titular,Lidia Soares afirma, lori ba iha laboratoriu ho konfirmasaun katak, kontein Cetamina.
“Depois ita foti nia amostra uitoan lori ba iha tes laboratoriu, fofoun mai ho tipu Cocaina maibe depois de tama ba iha laboratoriu ho konfirmasaun katak, nia kontein Cetamina tipu droga ida neebe tama hela iha ita nia tabela lei Droga nian lei numeru 02/2027,” dehan Lidia.
Nia afirma, tipu droga nee sei orijem seidauk mistura, kuandu nia mistura aumenta tan nia folin sei karun liu tan. No kuandu uluk halo aprensaun iha 11 ida deit nia bele hetan sento ital dolar, no kada grama trezentos ital.
Destruisaun nee ho desizaun Judisial bazeia ba iha pedidu Ministeriu Publiku nian, deklara lakon afavor ba Estadu tanba sasan labele rai kleur tenke halo destruisaun.
Tuir observasaun Jornalista STL haree iha terenu katak, material sira nee sunu iha fatin neebe pesoal saude sira prepara hela.
Jornalista: Terezinha De Deus
Editora: Carme Ximenes
