BAUKAU, STLTIMORLESTE.com – Ahi han mutuk idozu Apolinario Soares do Rego nia uma rua (2) iha Aldeia Betulale, Suku Ossouala, Postu Administrativu Vemasi, Munisipiu Baukau.
Komadante Operasional Autoridade Protesaun Sivil Munisipiu Baukau, Francisco Viana Freitas informa, insendiu nee akontese iha loron 14 Novembru 2025 parte dader, bainhira uma nain idozu Apolinario Soares do Rego idade liu 60 hamutuk ho nia bei oan mane ida sai ba hein karau hafoin insendiu afeta uma rua, kompostu uma dapur no uma hela fatin neebe taka ho tali tahan.
“Uma nee uma tali fasil atu insendiu lais, tuir informasaun nain rasik mos la hatene, karik haluhan ahi oan ruma iha uma laran ga halo nusa la dun hatene, rezulta uma nee sasan la sai, dala ruma uma nain sai haluhan hela hamate ahi,” Francisco informa ba jornalista sira, iha knaar fatin Tirilolo, Baukau, Segunda (17/11/2025).
Komadante nee argumentu, motivu husi insendiu nee parte uma nain la hatene, maibe deskonfia kauza husi sunu ahi matan iha uma laran neebe la konsege hamate, nunee ahi matan refere alastra hikas ba uma rua refere no la rezulta ema kanek no hetan kondisaun seluk tan, tanba insendiu refere akontese uma nain laiha uma.
Nia sublina, mezmu insendiu refere akontese Autoridade Suku informa kedas ba ekipa Bombeiru Munisipiu Baukau no too kedas fatin, maibe bainhira ekipa Bombeiru too iha fatin insendiu volume ahi tun ona no sasan uma laran la salva.
“Sasan uma laran la salva dadus ami foti hotu ona apoiu emerjensia, ami fo tiha ona parte rekuperasaun foti hotu ona dadus prosesu sira nee sei lao too nasional,” Francisco akresenta.
Nia deklara, sasan neebe mutuk hamutuk ho uma rua nee mak hanesan, sasan dapur nia, haree kulit kaut ida, batar, sasan kultural balu, roupa inklui idozu refere nia osan montante hamutuk US$ 800 ho dokumentus hanesan kartaun eleitoral, bilhete indentidade no seluk tan, maibe ekipa Autoridade Protesaun Sivil Munisipiu Baukau fo ona apoiu emerjensia inklui rekoilha informasaun no relata ona ba Nasional, hodi fo apoiu marerial rekuperasaun ba indozu refere hodi konstrui hikas nia hela fatin, tanba daudaun idozu Apolinario Soares do Rego ho nia bei oan hela hamutuk provizoriu iha familia nia uma.
Entretantu Autoridade Protesaun Sivil Munisipiu Baukau, rejistu uma hela fatin 4 ahi han mutuk,iha inisiu fulan Novembru tinan nee.
Jornalista: Tomas Reis
Editora: Carme Ximenes
