DILI, STLTIMORLESTE.com – Servisu Edukasaun Munisipiu Ainaro identifika eskola 15 ihia nivel pre eskolar no ensinu baziku, neebe lokaliza iha Munisípiu Ainaro presiza aumenta sala de aula ba estudantes sira.
Diretor Servisu Edukasaun Munisípiu Ainaro, Patricio da Costa Magno dehan, difikuldade neebe mak eskola sira iha area remotas enfrenta mak primeiru problema infraestrutura, tanba sala de aula mak sei menus.
“Nee duni ita identifika ona eskola neebe atu aumenta sala hodi nunee husi Ministériu bele ajuda. Nunee mos ita sei menus rekursu, eskola 15 mak sai tarjetu ami nian, nee mak ita presiza atu aumenta sala de aula, nee ba nivel ensinu baziku no pre eskolar,” haktuir Patricio da Costa Magno ba jornalista STL liu husi telefone, Segunda (17/11/2025).
Nia dehan, eskola 15 nee iha pre eskolar rua, restu nee ensinu baziku ho filial. Ida nee mak ba oin presiza atu aumenta sala de aula ba estudantes sira, tanba eskola 15 nee tenke aumenta sala.
Iha parte seluk Superintendente Edukasaun Munisipiu Dili, Cesarina Correia Guterres dehan, inspetor no inspetora sira nafatin halo monitoring ba atividades hotu neebe mak lao iha eskola sira, liu-liu eskola hirak neebe mak lokaliza iha Munisipiu Dili ninia, hodi haree dezafiu saida deit mak eskola sira enfrenta.
Jornalista: Jacinta Sequeira
Editora: Domingas Gomes
