DILI, STLTIMORLESTE.com – Eskola sira iha Munisípiu Vikeke finaliza ona programa merenda eskolar, no daudaun nee estudantes sira la asesu ona merenda eskolar.
Diretor Servisu Edukasaun Munisípiu Vikeke, Julio Sacadura esplika, kona-ba merenda eskolar lao hotu ona, tanba ninia implementasaun nee hahu iha tempu fulan Marsu 2025. Iha tempu neeba too mai iha Setembru, implementasaun ba ensinu baziku ninia lui-liu ba estudantes primeiru ano nomos nono ano, ninia implementasaun remata iha Setembru.
“Agora ba ensinu pre eskolar ninia remata iha fulan Outubru foin lalais nee, tanba nee agora estudantes la asesu ona ba programa nee,” katak nia ba jornalista STL liu husi telefone, Segunda (17/11/2025).
Tuir nia katak, ezekusaun programa merenda eskolar ba nivel ensinu baziku nee, ninia loron efetivu nee hamutuk 104 dias, ensinu pre eskolar loron efetivus 117 dias. Nee duni ninia implementasaun ba programa nee remata iha Setembru no Outobru tinan nee.
Iha fatin seluk, Belchior Maria Almeida Barros hanesan Xefe Departamentu Programa Merenda Eskolar iha ME haktuir, iha munisipiu seluk nee merenda eskolar lao hanesan baibain sei too dia 21 Novembru, tanba ensinu aprendizajen too deit dia 21 fulan nee. Likisa para iha fulan Setembru, Ainaro para iha inisiu fulan Outubru no RAEOA nia ezekusaun nee primeiru periodu nian nee gasta hotu ona.
“Kona-ba merenda eskolar agora daudaun lao hela, maibe Munisipiu Likisa mak hotu ona. Sira nian ezekusaun nee hahu iha Janeiru, sira nian orsamentu la sufisiente no sira hotu. Iha Oecusse mos agora paradu, munisipiu sira seluk nee normalmente merenda eskolar lao hanesan baibain. Munisipiu Ainaro mos daudaun nee paradu hela, tanba sira nian orsamentu la sufisiente too iha Novembru,” nia esplika.
Nunee mos Diretor Servisu Edukasaun Munisípiu Likisa, Julio da Silva dehan, implementasaun programa merenda eskolar iha Likisa ninia ezekusaun remata ona, tanba osan ba programa nee hotu ona.
Jornalista: Jacinta Sequeira
Editora: Domingas Gomes
