DILI, STLTIMORLESTE.com – Asosiasaun Hali Ba Dame (HABADA) husu ba Komando Polísia Nasional Timor Leste (PNTL) ho Ministeriu Interior (MI) atu halo investigasaun no fo sansaun todan ba Superintendente Asistente Polísia AQ neebe deskonfia falsifika dokumentu veteranu hodi hetan grau 8 a 14.
Diretor Ezekutivu Asosiasaun HABADA, Abel Amaral dehan, husu ba Diresaun Servisu Investigasaun Kriminál (DSIK) husi PNTL atu bele koopera ho komisaun verifikasaun dadus veteranu Munisipiu Lautem, atu bele verifika loos duni ka lae kona-ba informasaun falsifika dokumentu veteranu nee.
“Ita triste no lamentavel tebes ho atitude Superintendente Asistente Polísia AQ neebe deskonfia komete fasifika dokumentu veteran nian nee,” Abel Amaral liu husi Konferesia Imprensa iha nia knar fatin Komoro, Segunda (17/11/2025).
Nia dehan, presiza mos enkamina ba iha Ministériu Publiku (MP), para bele prosesu tuir leí kriminál nian, tanba flasifikasaun dokumentu nee krimi ida. Tanba nee husu ba Komandu PNTL nomos ba MI, se kuandu prova duni tenke fo sansaun ida neebe mak todan, tanba ida nee hatudu ezemplu la diak.
Iha fatin ketak, Veteranus Costantino Ximenes “Nehek Metan” informa, daudaun nee barak mak falsifika dokumentu, depois iha inan balun neebe uluk terus liu iha Militar Indonezia obriga sira halao seksu livre, sira rejistu maibe komisaun pendente ka kansela sira nia dokumentus, no veteranus balun nia osan iha banku iha maibe atu foti labele, tanba mate ona no sira fo razaun la los ba nia oan sira.
“Hau sente Governu tenke buka tuir no rezolve probelma sira neebe veteranus sira hasoru no veteranus sira nia oan hasoru,” dehan nia.
Nia hatutan, depois ida halo falsifikasaun dokumentu nee tenke fo solusaun, tanba hetan ona 8 a 14 nee labele. Osan veteranus nee laos osan baibain, maibe nee osan raan ho ruin nia osan, ida nee mak tenke hanoin didiak.
Jornalista: Jeniche da Costa
Editora: Domingas Gomes
