DILI, STLTIMORLESTE.com – Prokurador Jeral Republika (PJR), Nelson de Carvalho laiha ka lakohi fo komentariu ba kazu Dirijente Servisu Nasional Intelijensia (SNI) nain rua neebe hatama fugeti ilegal mai rai laran, iha loron hirak liu ba.
Bainhira remata destruisaun sasan kontra bandu ba material droga, iha Hospital Nasional Guido Valadares, Segunda (17/11/2025), jornalista sira tenta konfirma asuntu nee ba iha PJR, maibe PJR la fo komentariu. “Hau agora lakohi koalia buat ida,” dehan PJR, Nelson ba jornalista sira, iha HNGV, Segunda (17/11/2025).
Iha fatin ketak, Jurista Sergio Dias Quintas hatete, SNI nee instituisaun estadu neebe toma konta ba seguransa publika, entaun ema neebe servisu iha instituisaun refere tenki komporta diak laos pelo kontrariu.
“Ba elementu SNI nain 2 neebe utiliza kareta estadu hodi hatama fugeti ilegal mai rai laran to aparelhu seguransa deskobre ho forma flagrante de delito ka kaer ho liman, devia ema nain 2 nee detein kedas iha sela detensaun tanba pratika krime publiku ho nia tipo de krime kontrabandu previstu iha artigu 316, ka krime deskaminho iha artigu 317 husi kodigu penal,’ dehan Sergio.
Jurista nee mos kestiona tanba saida Polisia la detein imediatu elementu SNI nain rua nee, sera ke tanba sira tropa ka Polisia, karik nee mak ema sivil iha possibilidade bele detein kedas. Tuir lolos detein sira iha sela pois lori ba Tribunal, para sujeitu ba primeiru interrogatoriu tuir artigu 217 husi Kodigu Prosesu Penal.
Nunee ida seluk maka SNI tenki foti medida disiplinar ruma ba elementu nain rua nee, tanba la komporta diak hodi estraga imazen instituisaun, dalan diak liu maka demite sira husi SNI.
Antes nee Komandante PNTL Munisipiu Likisa informa katak, prosesu refere submete ona ba iha Ministeriu Publiku (MP).
Jornalista: Terezinha De Deus
Editora: Carme Ximenes
