BAUKAU, STLTIMORLESTE.com – Aimoruk 18% iha Sentru Saude Baguia, Munisipiu Baukau, stok laiha, maibe la fo impaktu ba atendimentu.
Informasaun nee hatoo husi Xefe Sentru Saude Baguia, Agostinho Guterres ba jornalista STL iha Vila Nova Baukau, Segunda (17/11/2025).
“Aimoruk iha Sentru Saude Baguia too ohin loron nee stok laiha nee atinjii 18%, signifika aimoruk sei disponivel hela, ita labele mensiona detalhu, tanba ita presiza mai farmasia rekolha dadus, maine informasaun husi relatoriu nee iha deit 18%,” nia informa.
Xefe Sentru Saude nee hateten, stok aimoruk 18% daudaun laiha iha Sentru Saude Baguia labele esplika detalhu, maibe la fo impaktu ba atendimentu iha Sentru Saude Baguai, tanba daudaun atendimentu ba pasiente sira kontinua lao hanesan baibain.
Nia katak, stok aimoruk laiha iha Sentru Saude Baguia ho 18% kobre item la too 10, tanba atendimentu kontinua lao.
“Pedidu fulan fulan ita halo hela, mais dala ruma SAMES rejional mos laiha stok nee mak sira la distribui nee,” Agostinho informa.
Xefe Sentru Saude Baguia nee katak, relasiona aimoruk 18% daudaun iha Sentru Saude Baguia laiha, nia parte relata ona pedidu ba SAMES rejional, maibe la distribui aimoruk ba Sentru Saude Baguia, tanba razaun SAMES rejional mos stok laiha.
Mezmu stok neebe Sentru Saude Baguia husi SAMES rejional seidauk hatan ho distribui aimoruk, maibe Sentru Saude Baguia nafatin funsiona hodi fo atendimentu ba pasiente sira, tanba hetan apoiu aimoruk husi Hospital Referal Baukau no Sentru Saude neebe iha dispovel.
Too notisia nee publika, STL seidauk halo konfirmasaun ho SAMES rejional Baukau, tanba okupadu.
Entretantu Janeiru too Outubru tinan nee, Sentru Saude Baguia la krese aimoruk stok laiha, la too 25%.
Jornalista: Tomas Reis
Editor: Xisto Mendonça
