DILI, STLTIMORLESTE.com – Servisu Edukasaun Munisipiu Ainaro rekomenda ba Ministeriu Edukasaun (ME) nasional atu aumenta profesores ba iha nivel ensinu baziku no pre eskolar.
Liafuan nee haktuir husi Diretor Servisu Edukasaun MunisÃpiu Ainaro, Patricio da Costa Magno ba jornalista STL liu husi telefone, Tersa (18/11/2025).
Nia dehan, kolokasaun bolsa kandidatu primeiru nee 43, segundu 42 no terseiru iha 10, hamutuk 95. Husi numeru nee presiza eskolar nain 3 no restu nee nivel ensinu baziku. Munisipiu Ainaro nee eskola balun mak profesores seidauk sufisiente.
“Nee mak ami rekomenda hela ba Ministeriu katak, karik sei iha bolsa kandidatu ami rekomenda bele aumenta profesores tuir quadro pesoal neebe mak iha, aumenta ba nibel pre eskolar no Ensinu Baziku ninia,” afirma nia.
Nia dehan, rekomendasaun atu aumenta profesores ba nibel rua nee, SEM hatoo ona ba ME Nasional liu husi rekursu umanu, maibe sira nian resposta mak hein deit. Tanba buat hotu bazeia ba iha orsamentu, tanba rekursu umanu iha planu hela ba rekrutamentu nivel ensinu sekundariu no tekvo ninia.
“Ami nian eskola barak, maibe ninia kuatidade eskola nee mak seidauk hatene lo-loos, tanba ita inklui ho ita nian eskola sira paralelu nee, tanba nee ita seidauk hatene lo-loos eskola ninia kuantidade nee hira. Total ensinu baziku sura ho paralelu sira nee hamutuk 93, pre eskolar 50 maibe identifika iha deit 47,” nia informa.
Entretantu Diretor Eskola Sekundariu Jeral 10 dezembru Komoro, Manuel Verdial hatete, nee duni ba oin sira presiza tan professores ba materia rua ou tolu tan, tanba sira nian professores nain rua mak atu tama ba idade reforma ninia. Nee duni sira husu atu aumenta profesores nain 8 ou nain 10.
Jornalista: Jacinta Sequeira
Editora: Domingas Gomes
