DILI, STLTIMORLESTE.com – Feto nia matenek sei bele kontribui ba dezenvolvimentu nasionál.
Feto Potensial Maria Amaral hatete, feto barak mak oras nee iha kapasidade hodi bele kontribui ba dezenvolvimentu.
“Feto nia matenek sei bele kontribui ba dezenvolvimentu nasional, tanba nee nafatin kapasita aan hodi prepara aan, atu nunee bainhira hetan oportunidade bele kompete,” katak nia ba STL iha nia knaar fatin Kaikoli, Tersa (18/11/2025).
Nia afirma, maske sei hasoru dezafiu barak maibe feto nia esforsu bele lori mudansa ba sosiedade no nasaun.
Nunee mos Prezidente Grupu Feto Parlamentu Timor Leste (GMPTL), Deputada Alianca da Conceicao Aroujo hatete, feto rural mak aihun moris komunidade, tanba bainhira aihun nee forte sei buras no fo matak malirin ba aitahan no ai sanak sira hetan fresku no matak, se aihun fo matak malirin no hanesan sanak sira hetan fresku no matak no lasimu bee kbiit loron matan nia sei namlaek, nunee tenke fo bee fo kbiit no fo oportunidade ba feto rural atu kontinua moris no sustenta komunidade.
“Bainhira investe iha feto rural, ita investe iha moris, iha natureza no futuru Timor Leste, maibe ita labele haluha katak feto rural imfrenta situasaun difisil feto barak seidauk iha rai ho nia naran, lahetan oportunidade iha formasaun lideransa, infrenta obstaklu iha asesu ba saude no formasaun, mudansa klimatika halo difisil bainhira rai monu feto labele kuda, bainhira bee laiha feto mak ba buka, feto mak buka dalan sustenta familia,” dehan nia.
Nunee mos Feto potensial, Joaninha Dos Santos Piedade neebe haknaar aan iha Telkomcel hatete, husu feto sira nafatin kontinua luta ba oin.
Mensajen ba iha feto sira atu bele kontinua luta ba oin atu partisipa iha prosesu dezenvolvimentu nasional.
“Hau nia mensajen ba hau nia feto maluk sira, hanesan hakerek ona iha Konstituisaun Republika Demokratika de Timor-Leste iha artigo 19 versículo 1, katak dever sidadania juventude nian, no sira nia obrigasaun atu konsolida unidade nasional, partisipa iha rekonstrusaun, halo defeza no dezenvolve nasaun. Hafanun ita feto maluk sira hotu atu bele hamrik metin no fiar metin iha ita nia an rasik atu bele halo buat ruma ba ita nia an, familia, no ba nasaun liu husi ita nia servisu no kapasita an nafatin nune bele hola parte iha dezenvolvemento ba nasaun timor Leste,” katak nia.
Nia haktuir, feto sai ativu tiur nia hanoin no hare iha tinan hira mai ne, partisipasaun Feto nian iha fatin barak mk hatudu ona pontus positivo. La taka matan mos iha fatin balun sei iha nafatin diskriminasaun no igualdade jeneru no violasaun domestika ne nafatin iha.
Nia mos hatoo mensajen ba iha juventude sira atu hadook aan husi hahalok krime sira, tanba joven mak futuru nasaun nia.
Jornalista: Emerenciana Pinto
Editora: Domingas Gomes
