BAUKAU, STLTIMORLESTE.com – Departementu Mekanizasaun husi Servisu Munisipal Agrikultura Baukau preokupa ho Autoridade Munisipiu Baukau, tanba aloka deit orsamentu US$ 1.000 ba manutensaun traktor boot hamutuk unidade 31.
Xefe Departementu Mekanizasaun, João Nazaret dos Reis Freitas hateten, traktor boot neebe Governu liu husi Ministeriu Agrikultura Pekuaria Peskas no Floresta destaka iha Servisu Munisipal Agrikultura Baukau hamutuk unidade 31, maibe unidade 13 deit mak halao operasaun fila rai gratuitu ba komunidade agrikultores sira toos enkuantu unidade 13 paradu, tanba kondisaun avaria total no unidade 5 labele halao servisu fila rai, tanba elementus hanesan roda no diador laiha, maibe laiha orsamentu atu halo manutensaun, tanba orsamentu anual neebe Autoridade Munisipiu Baukau aloka iha tinan 2025 ho montante rihun US$ 1.000, neebe labele responde ba manutensaun traktor boot unidade 5 neebe labele halao servisu fila rai.
“Nee falha tanba orsamentu husi Munisipiu tinan ida tau US$ 1.000 ba trator 31 nee, tanba nee mak failha la too duni tanba US$ 1.000 deit, US$ 1.000 nee mos laos foti dala ida trimestral ida foti US$ 250,00 too tinan ida mak US$ 1.000,” Nazaret dos Reis Freitas hateten ba jornalista sira, iha knaar fatin Vila Nova, Baukau, Tersa (18/11/2025).
Nia kompara, orsamentu ba manutensaun tratok boot neebe Autoridade Munisipiu Baukau aloka ho montante US$ 1.000 la sufisiente, tanba komponente traktor nian folin la hanesan ho komponente motor roda rua nian no hanesan komponente ba karreta mikrolete nian, maibe komponente ba traktor nian folin karun nunee orsamentu neebe Autoridade Munisipiu Baukau, aloka iha tinan 2025 nee halo manutensaun deit ba traktor unidade ida.
Xefe Departementu Mekanizasaun nee komenta, pedidu orsamentu neebe aprezenta ba Autoridade Munisipiu Baukau, ba manutensaun traktor boot nian ho estimasaun montante liu rihun US$ 5.000, maibe hetan redusaun.
“Nia estimasaun ita nia administrasaun tau osan boot tiha ona mais ita nia sempre kua, tanba nee mak failha, US$ 1.000 nee sosa deit kamardial mos labele ona satan halo manutensaun,” Nazaret argumentu.
Tuir nia, prezisa Autoridade Munisipiu no Governu Sentral tau orsamentu boot iha manutensaun traktor nian, nunee bele halo manutensaun ba traktor hirak neebe avaria hodi funsiona hikas apoiu fila rai no halai natar, gratuitu ba komunidade agrikultores sira nunee bele reduz produtu importadu mai Timor Leste.
Tanba Governu liu husi Ministeriu Agrikultura Pekuaria Peskas no Floresta investe makaas ona iha area irrigasaun neebe konsege fornese bee ba natar sira neebe abandona tinan barak, maibe traktor nafatin avaria nee fo impaktu ba numeru produsaun iha rai laran.
“Nee fo duni impaktu tanba numeru natar ho toos iha rai laran sae makaas, maibe ita nia kondisaun traktor mak oituan deit, entaun presiza tinan ida US$ 5.000 ba leten nee bele,” Nazaret katak.
Irrigasaun boot sira iha Munisipiu Baukau hanesan irrigasaun Galata konstrusaun besik finaliza ona, irrigasaun Uatuwa iha faze konstrusaun no irrigasaun iha Vemasi hahu faze preparasaun ba faze konstrusaun nian neebe bainhira irrigasaun sira nee konkluidu sei oferese bee ba natar hektares barak iha Baukau, maibe traktor neebe daudaun destaka atu fila rai no apoiu halai natar ba komunidade agrikultores sira maioria avaria, tanba failha iha aloka orsamentu ba manutensaun.
Nunee Xefe Mekanizasaun nee husu Autoridade Munisipiu Baukau atu aloka orsamentu ba manutensaun traktor boot tenke liu montante US$ 5.000, hodi nunee bele responde ba kondisaun traktor sira apoiu fila rai no halai natar, ba komunidade agrikultores sira hodi badinas servisu krese numeru produsaun iha rai laran liu liu iha Munisipiu Baukau.
Too notisia nee publika, STL seidauk halo konfirmasaun ho Prezidente Autoridade Munisipiu Baukau Veneranda Lemos, tanba bainhira atu halo konfirmasaun, Prezidente sei okupadu enkontru ho parseiru dezenvolvimentu sira.
Jornalista: Tomas Reis
Editora: Carme Ximenes
