DILI, STLTIMORLESTE.com – Tribunal Judisial Primeira Instansia Dili (TJPID) liu husi desizaun ikus, deside aplika pena admoestasaun ba arguidu HXS hanesan aman, neebe halo agresaun hasoru lezada AXS hanesan oan.
Iha desizaun nee Tribunal haree katak, iha atenuantes balu nee halo kaman arguidu, tanba nee Tribunal tetu sirkunstansia sira hotu, no desidi aplika pena refere ba iha arguidu.
Pena neebe Tribunal aplika, hanesan xamada ida ba iha arguidu, atu iha futuru arguidu labele pratika tan aktu refere.
Tuir akuzasaun katak, iha loron 18 fulan Novembru tinan 2023, haleu oras tuku 16:30, otl, iha Tarati, Aileu, arguidu HXS lori liman basa dala rua kona iha ofendida nia hasan sorin los no karuk.
Konsekuensia direta husi agresaun nee ofendida hetan moras makas iha hasan sorin karuk, ho los no foin rekoopera durante loron rua.
Arguidu HXS halo ho forma livre, deliberada no konsientemente hatene katak, lori liman basa dala rua kona iha ofendida nia hasan sorin loos no karuk, nudar meiu neebe aptu hodi hamosu ofensa ba lezada nia isin lolon no saude.
Arguidu hatene katak, nia hahalok nee, proibidu no punidu tuir lei penal.
Tanba nee, konstitui arguidu HXS, nudar autor material ho forma konsumadu ba pratika krime ofensa ba integridade fizika simples ho forma violensia domestika 1 (ida), previstu no punidu tuir artigu 145º husi Kodigu Penal konjuga ho artigu sira 2, 3 alinea a) no art. 35º alinea b) hosi Lei Kontra Violensia Domestika n.º07/2010, loron 07 fulan Jullu.
Audensia julgamentu nee, prezide hosi Juiza, Fransisca Cabral, Ministeriu Publiku reprezenta husi Prokurador estajiariu nain ida, no arguidu hetan asistensia legal husi Advogadu Privadu, Evangelino Gusmão.
Jornalista: Terezinha De Deus
Editora: Carme Ximenes
