BAUKAU, STLTIMORLESTE.com – Servisu Munisipal Saude Baukau (SMSB) rekonhese, kareta multi funsaun husi Sentru Saude Baguia labele ba tula pasiente sira iha Suku Hae-Coni, Osso-Huna no Afaloikai, tanba kondisaun estrada aat, maibe husu inan isin gravida sira ba halao tratamentu iha Postu Saude Osso-Huna.
Diretor Servisu Munisipal Saude Baukau, Cristiano Cipriano Belo hateten, relasiona informasaun neebe espalha kona-ba inan isin gravida tula ho motor husi Suku Hae-Coni ba Sentru Saude Baguia, tanba kareta multi funsaun neebe destaka iha Sentru Saude Baguia labele too iha Suku Hae-Coni nee loos, tanba estrada diresaun husi Baguia Vila ba Hae-Coni too iha Suku Afaloika kondisaun aat.
Maibe bainhira inan isin gravida ruma prezisa tulun husi parteira sira la prejisa too iha Sentru Saude Baguia, tanba Governu liu husi Ministeriu Saude estabelese ona Postu Saude iha Suku Osso-Huna, atu fo asistensia saude ba komunidade sira neebe presiza inklui inan isin gravida sira.
“Hau hanoin atendimentu ita bele halo iha Postu Saude Osso-Huna, tanba iha neeba iha parteira no enfremeiru entaun bele fo asistensia iha neeba do que sira mai Sentru Saude diak liu hakbesik aan ba iha Postu Saude Osso-Huna, entaun husu ba inan isin rua sira bele ba iha fasilidade, ita hatene Baguai kondisaun estrada la duun diak entaun atendimentu transferensia sira nee difikulta,” Cristiano hateten ba STL, iha knaar fatin Tirilolo, Baukau, Tersa (18/11/2025).
Diretor Servisu Munisipal Saude Baukau nee husu ba komunidade sira iha Suku Hae-Coni, Osso-Huna no Afaloikai bainhira iha nesesidade moras no prezisa tratamentu hakbesik aan ba Postu Saude Osso-Huna, atu nunee bele hetan atendimentu husi parteira no enfremeiru neebe Ministeriu destaka ona iha Postu Saude refere, maibe hakarak atu ba Sentru Saude Baguia fasilidade estadu hanesan kareta multi funsaun no seluk tan labele halo transferensia pasiente husi Suku 3 refere ba Sentru Saude Baguia, tanba kondisaun estrada husi Baguai Vila ba Suku 3 refere kondisaun grave.
“Ita atu tau multi funsaun iha neeba se nu kazu estrada ga dalan la diak labele obriga, para karreta nee sae ba hetan risku entaun ita haree mos kondisaun dalan la diak,” Cristiano katak.
Tuir Diretor nee katak, bainhira atu halo tranparansia pasiente husi Suku Hae-Coni, Osso-Huna no Afaloikai ba Sentru Saude Baguia karreta multi funsaun liu husi Postu Administrativu Kelikai hafoin too iha Suku 3 refere tula pasiente, tanba kondisaun estrada grave, maibe bainhira kundotor karrera multi funsaun obriga sae husi Baguia ba Suku 3 refere bele hetan asidente iha dalan.
“Dalan nee sae ba mak labele, maibe tun mai bele so sae ba mak labele tanba kondisaun estrada,” Cristiano informa.
Iha sorin seluk veteranu Fernando Beredu’u Gusmão husu Governu liu husi Ministeriu Obras Publikas, atu tau atensaun ba kondisaun estrada diresaun husi Baguia ba Suku 3 hanesan Osso-Huna, Afaloika no Hae-Coni, tanba daudaun kondisaun estrada grave difikulta movimentu transporte publiku no privadu sira liu liu halo transferensia pasiente husi Suku 3 refere ba Sentru Saude Baguia.
“Estrada ba Suku Hae-Coni, Osso-Huna no Afaloikai la duun diak moras iha neeba karreta privadi Estadu mos labele ba, ami veteranu husu ba Governu estrada nee tenke hadia para moras ruma iha karreta Estadu la ba neeba karreta privadi bele tula ba konsulta,” Beredu’u komenta.
Tuir veteranu tinan 24 nee preokupa ho informasaun sira kona-ba inan isin gravida bainhira prezisa, atu partu obrigatoriu familia tula deit ho motor husi Suku Hae-Coni ba Sentru Saude Baguia hafoin hetan atendimentu husi parteira sira.
“Nee fo impaktu ba ema nia saude, dala ruma nia moras deit la mate, maibe sae fali motor tuir dalan monu bele mate, probelma ida nee mak ita husu Governu hadia estrada nee,” nia ezije.
Jornalista: Tomas Reis
Editora: Carme Ximenes
