DILI, STLTIMORLESTE.com – Prezidensia Republika (PR) apoiu parsel natal ba estudante Orfonatu Carmelita no Topo Honis iha Oekusi, nuudar domin Prezidente Republika Jose Ramos Horta ba nia povu.
Ekipa Presidensia Republika fahe parsel natal ba komunidade Orfonatu Carmelita no Topo Konis hodi festeza tempu natal 2025 no tinan-foun 2026, liuhusi programa “Natal do Povo”, kontinua distribui prezente parsel natal ba estudante no labarik sira iha Kolejiu Nossa Senhora do Carmo (Orfanatu Carmelita) no Orfanatu Topo Honis iha RAEOA.
Koordenadora Unidade Apoiu Sosial, Teresa Ximenes hateten, Prezidente Jose Ramos Horta kontinua fo apoiu ai-haan nesesariu hanesan roupa, sepatu, manta no equipa desportiva ba orfanatu no uma mahon sira antes tama loron boot natal no tinan-foun 2026.
“Prezente simples ida nee husi Sua Excelensia Prezidente atu fo ksolok ba komunidade, liu-liu jovens foin-sae sira neebe hela iha orfonatu no uma mahon,” hatete Teresa liu husi komunikadu neebe STL asesu husi media PR Kuarta (19/11/2025).
Nunee mos Responsavel Kongregasaun Kolejiu Nossa Senhora do Carmo, Madre Orlandina Xavier Fatima, hatooo agradesimentu ba Prezidente Horta neebe tulun ona orfonatu sira.
“Ami agradese boot ba Avo Ramos Horta neebe ho laran luak sempre tau matan mai ami iha kolejiu no orfonatu sira iha RAEOA,” dehan Irmã Orlandina.
Nia akresenta, apoiu nee sei fo motivasaun ba estudante sira atu kontinua estuda ho diak.
Reprezentante Estudante Kolejiu, Aliansa Taçho Sequeira Neno, fo mos votos feliz natal ba Prezidente Republika.
“Ami hakarak fo feliz natal ba nai Prezidente Avo Ramos Horta maske tempu falta semana balun tan no ami husu atu Avo Horta kontinua ho saude diak hodi bele servi rai no povu Timor Leste,” dehan Aliansa.
Orfanatu Carmelita iha kolejiu akomoda total 28, neebe kontinua simu apoiu husi Prezidensia Republika. Hafoin nee ekipa Prezidensia Republika kontínua vizita mos Uma Mahon iha Orfanatu Topo Honis hodi entrega mos parsel natal nesesidade bazika ba labarik no estudante sira iha orfonatu refere.
Loron tuir mai iha dadersan ekipa Prezidensia vizita mos Orfanatu Topo Honis, hodi distribuí parsel prezente natal ba labarik vulneravel sira.
Koordenadora Jeral, Imelda Liliana “Tarun”, agradese tebes ba ajuda husi Prezidensia no nia dehan apoiu nesesidade ho kuantidade boot, nunee sira sei fahe mos ba família vulneravel sira iha komunidade.
Numeru labarik estudante sira hela iha Orfanatu Topo Honis mak; estudante sira iha foho Mahata 20 (16 hela ativu no nain 4 fila ba família. Iha fali Asrama Qutet: total labarik hamutuk 19.
Koordenadora Imelda Tarun, aprezia ho ksolok ba Prezidente Republika nia programa prezente natal neebe mai antesipada iha fulan Novembru no nia husu atu programa solidariedade hanesan nee kontinua iha futuru.
Jornalista: Emerenciana Pinto
Editora: Domingas Gomes
