DILI, STLTIMORLESTE.com – Jeneral Reforma Lere Anan Timur apelu ba nasaun atu labele haluha sakrifisiu husi aman eroi sira.
Reprezenta Prezidensia Republika, Jeneral (Reformadu) Lere Anan Timur, Asesor Polítiku Prinsipal ba Prezidente Republika, Jose Ramos-Horta, hatoo diskursu ida neebe forte no emosional durante serimonia funeral dedika ba veteranu sira-nia restu mortais iha Manatuto, Tersa (18/11/2025).
Nia husu nasaun labele haluha heroi sira nia luta.
Jeneral Lere fo omenajen ba kombatente sira neebe fo sira-nia vida ba independensia nasaun nian.
Nia subliña, eroi lo-loos mak sira neebe mate durante luta.
“Ita sira neebe sei moris laos eroi, eroi mak sira neebe mate ona ba ita-nia liberdade,” afirma nia.
Tuir Jeneral, estadu nia dever solene ida atu asegura katak eroi sira nee simu dignidade no onra ba neebe sira merese ba sira-nia sakrifisiu.
Nia subliña mos, terus naruk neebe família sira hasoru, hanoin fila-fali sira-nia matan-been wainhira sira simu bandeira nasional nuudar símbolu ida husi sira-nia lakon ba ente keridu sira.
Jeneral Lere fo hanoin ba ema hotu katak, independensia Timor Leste nian laos prezente ida, maibe hetan husi sosa ho raan ho isin, nia dirije partikularmente ba jerasaun foun sira, husu ba sira atu koñese no rai didiak istoria husi luta ba soberania no harii futuru ida neebe onra sakrifisiu sira husi jerasaun tuan sira, hodi garante katak liberdade neebe nasaun hetan ho susar nee sei la sai hanesan buat baibain deit.
Iha parte final diskursu, Jeneral apela ba kura nasional no prosesu rekonsiliasaun neebe kontínua. Husu ba sidadaun hotu atu iha koñesimentu kona-ba fatin neebe restu mortal kombatente sira neebe seidauk hetan atu labele tauk fo hatene, atu nunee bele permite kada eroi ida bele hakoi ho dignu.
Partisipa iha sermonia nee Adjunta Xefe Kaza Sivil Prezidensia Republika, Henriqueta Maria da Silva hatudu aktu ida nee nuudar dever nasional no sagradu, importante tebes atu taka kapítulu ida neebe nakonu ho terus iha nasaun nia istoria no hametin fundasaun unidade nasional nian.
Jornalista: Emerenciana Pinto
Editora: Domingas Gomes
