VENILALE, STLTIMORLESTE.com – Husi fulan Janeiru too Outubru tinan nee, Sentru Saude Venilale rejistu moras Infesaun Respiratoriu Agudu (ISPA) hamutuk 5.284.
Xefe Sentru Saude Venilale, Marciana O. da Costa esplika, Sentru Saude Venilale simu no fo atendimentu saude ba komunidade sira husi Suku 8 iha Postu Venilale hamutuk 17.869. Kada loron Sentru Saude Venilale simu komunidade neebe halo konsulta saude husi nain 50 too 150, maibe husi numeru konsulta neebe Sentru Saude Venilale rejista inisiu fulan Janeiru too Outubru 2025 nee maioria moras Infesaun Respiratoriu Agudu (ISPA) husi tipu moras siran.
“Ami rejista iha nee kazu aas liu nee ISPA, husi fulan Janeiru too iha fulan Outubru iha kazu 5.284 no kazu segundu mak moras kulit no kazu kiik liu mak teben ho ran ho asu tata,” Marciana hateten ba STL, iha nia knaar fatin Venilale, Kuarta (19/11/2025).
Nia sublina, husi fulan Janeiru too Outubru tipu moras neebe rejista hanesan moras seluk 15.231, ISPA 5.284, moras kulit 2.379, scabies 958, asidente seluk 797, HTA 716, teben akuta 597, artritis 595, gastritis 132, pneomonia 230, reumatik 178, asidente trafiku 142, anemia 84, asu tata 33 no teben ho ran 33.
Nia fundamenta, husi tipu moras hirak refere afeta ba komunidade sira kauza rai rahun, ahi suar, komsumu bee moos no seluk tan la hijene, maibe husi tipu moras hirak nee la afeta pasiente sira kondisaun grave, tanba parte pesoal saude sira fo asistensia saude sedu, maibe iha mos pasiente balu konsege Sentru Saude halo transferensia ba Hospital Rejional Eduardo Ximenes (HoREX) Baukau, la kestaun aimoruk mak laiha atu fo atendimentu ba sira, maibe halo transferensia, tanba pasiente sira kondisaun grave.
“Liga ba kazu neebe ita haree nia gravidade, ita haree nia seriu ita transfere, maibe haree neebe natoon moderadu ami bele halo atendimentu iha nee, tanba ami nia pesoal sira nee mesak trinadu hotu,” Marciana akresenta.
Nia deklara, atu reduz ISPA, moras kulit, scabies, HTA, teben akuta, artritis, gastritis, pneomonia, reumatik, anemia no teben ho ran presiza komunidade sira nia konsensia hodi kuidadu aan, maibe parte saude kontinua esforsu eduka komunidade sira liu husi promosaun no siensebelizasaun hodi hasae komunidade sira nia konhesimentu atu kuida sira nia saude.
Entretantu Sentru Saude Venilale nia atendimentu ba komunidade sira husi Suku Fatulia, Uatu-Haco, Uailha, Uma Ana Ulo, Uma Ana Ico, Bado-Ho’o, Baha-Mori inklui Uai-Oli.
Jornalista: Tomas Reis
Editora: Carme Ximenes
