DILI, STLTIMORLESTE.com – Tribunal Judisial Primeira Instansia Dili (TJPID) kontinua halao julgamentu kona-ba kazu sukestru no abuzu poder neebe envolve husi arguidu nain tolu ho inisial JXB, MdC, DNS hodi kontinua rona sasin ida kona-ba kazu neebe baku lezadu AS.
Prosesu refere, antes nee Tribunal rona ona arguidu sira, lezadu inklui sasin balu, tanba nee iha julgamentu kontinuasaun nee Tribunal kontinua rona sasin nain rua.
Iha julgamentu kontinuasaun nee, sasin Daniel deklara katak, momentu neeba sasin maka kontaktu lezadu sira nain rua hemu kafe iha Farol.
Sasin deklara, liu tiha minutu balu iha ema nain tolu ba hodi foti lezadu, maibe sira nain tolu lori lezadu tun husi eskada fatin neebe sira hemu kafe ba sasin haree hela, maibe kona-ba sira baku lezadu sasin la haree ida.
Sasin deklara, depois too tiha uma, sasin kontaktu ba iha lezadu maibe lezadu nia numeru mate hela.
Aleinde nee sasin Jose Nunes nuudar PNTL deklara katak, momentu neeba sasin asumi knaar hanesan Investigador iha Kuartel Jeral Polisia Nasional Timor Leste (PNTL).
Sasin deklara, momentu neeba arguidu nain tolu hanesan forsa F-FDTL maibe halao servisu intelijensia lori lezadu ba iha Kuartel, tanba deskonfia lezadu envolvimentu uza veteranu sira nia naran katak, nia estatus hanesan ho veteranu sira no simu orientasaun sai hanesan Koordenador Servisu Ordem Sekreta (SOS), hodi halao kobransa.
Nunee arguidu sira lori lezadu ba, sasin halo indentifikasaun ba lezadu durante oras 12, no sasin mesak maka halo indentifikasaun, remata sasin liberta kedan.
Maibe iha indentifikasaun laran sasin la haree lezadu hetan agresaun, karik agresaun akontese iha liur sasin la iha konesementu, maibe durante indentifikasaun sasin haree lezadu nia isin diak hela, no lezadu rasik la informa ba sasin katak hetan agresaun husi arguidu sira.
No momentu neeba sasin atu lori lezadu fila, maibe lezadu dehan nia kolega ida maka tula nia fila, tanba nee sasin mos haruka lezadu fila.
Hafoin arguidu nain tolu lori lezadu ba ho karreta, depois entrega ba sasin hodi halo indentifikasaun, no sala indentifikasaun nia laran iha lezadu mesak no sasin.
Defeza konfirma ba sasin, durante investigasaun lezadu rasik deklara nia uza maneira neebe bosok, hodi simu osan husi vitima sira ho foto, razaun atu hatama vitima sira ba iha Serbisu Ordem Sekreta (SOS).
Rona tiha sasin sira, Tribunal adia ba loron seluk hodi tama ba iha faze alegasaun.
Tuir akuzasaun neebe mai husi Ministeriu Publiku katak, iha loron 28 Janeiru 2022, tuku 8:30 kalan, arguidu JXB, kontaktu ba lezadu AS liu husi telemovel no konvida lezadu atu ba hemu kafe iha jardim Motael Dili, ho intensaun atu koalia kona-ba projetu eletrisidade.
Hafoin kontaktu lezadu ho nia kolega DP ba iha fatin neebe determina husi arguidu JXB. Bainhira too iha fatin refere, parte lezadu hasoru malu ho arguidu no sira koalia konaba asuntu neebe temi ona.
No lezadu haree arguidu haruka mensajen, maibe lezadu lahatene arguidu haruka mensajen ba se. Hafoin lezadu koalia hela ho arguidu JXB, ema neebe arguidu haruka mensajen ba nee lakleur deit sira mos mai.
Sira nee maka hanesan arguidu JXB, hamutuk ho arguidu MdC no DNS no ema sira neebe nia la konese, no diretamente halo agresaun ba lezadu, tuku iha ibun, hirus matan no kuaze isin tomak.
Hafoin halo ataka fiziku ba lezadu, no sira kontinua lori lezadu ba Kuartel Jeral PNTL iha Kaikoli, Dili. Bainhira too iha sala investigasaun iha Kuartel Jeral PNTL, Kaikoli, Dili, arguidu DNS obriga lezadu asina dokumentu neebe sira prepara tiha ona, maibe lezadu lakohi asina.
Nune arguidu DNS tuku iha lezadu nia hasan sorin loos no kontinua tuku lezadu iha kakorok too monu ba rai no halo moras no kanek.
Sira obriga lezadu atu asina dokumentu nee, maibe lezadu lakohi no arguidu DNS kaer lezadu nia liman no asina dokumentu nee.
Arguidu sira laiha autoridade atu detein ema seluk, maibe arguidu sira, JXB, MdC no DNS, uza sira nia autoridade nuudar membru F-FDTL hodi halo asaltu fiziku ba parte neebe hetan kanek, hodi obriga sira tenke asina dokumentu neebe sira prepara tiha ona.
Arguidu sira, tula lezadu ho karreta neebe laiha numeru xapa matrikula ba Kuartel Jeral PNTL, iha neebe sira asalta ho fiu eletrisidade metan iha nia isin lolon tomak.
Arguidu sira, bainhira halao aktu sira neebe deskreve, sira hatene katak lei bandu, sira atua ho livre, deliberada no konsiente, no la hadook an husi hahalok hanesan nee. Sira hakarak atu estraga parte neebe hetan kanek iha nia integridade fiziku, hodi hamosu moras no kanek sira, neebe maka akontese duni.
Arguidu sira, tau lezadu iha sala investigasaun iha Kuartel Jeral PNTL, la konsege sai hosi fatin, asalta nia ba objetivu ida nee no, nunee hasai nia liberdade, neebe sira hotu hakarak halo ho livre, no ho konsiensia.
Maizumenus iha tuku 11:00 p.m., arguidu sira tula fali lezadu neebe ho kondisaun grave ona, iha karreta ida no husik hela iha area Palapasu, Dili.
Arguidu sira, hatene didiak katak sira-nia hahalok hetan bandu no punivel husi lei nuudar krime, no nunee viola dever sira neebe iha sira nia estatutu nuudar membru F-FDTL no funsionariu publiku sira, liuliu dever imparsialidade, laran manas, lealdade no integridade, hodi tau iha risku interese Estadu nian no legalidade asaun husi ninia orgaun hotu hotu no ninia ajente sira-nia onestidade, nudar indispensavel ba kondisaun sira ezersisiu ba sira nia funsaun publika.
Tanba nee Ministeriu Publiku akuza arguidu nain tolu komete krime, Sukestru no Abuzu Poder neebe previstu iha artigu 160 no artigu 297.
Audensia julgamentu nee, prezide husi Juiz Kolektivu, Ana Paula, Ersilia de Jesus, Jose Maria, Ministeriu Publiku reprezenta husi Prokurador, Aderito Tilman, arguidu sira hetan asistensia legal husi Defensor Publiku, Sergio Dias Quintas.
Jornalista: Terezinha De Deus
Editora: Carme Ximenes
