DILI, STLTIMORLESTE.com – Ministeriu Publiku (MP) akuza arguidu inisial OGS ho pena multa, tanba loke bola guling ka komete krime esplorasaun ilisitu ba jogu.
Tuir akuzasaun neebe iha katak, iha loron 14 fulan Novembru tinan 2023, arguidu loke hela bola guling.
Jogu neebe halao la hetan autorizasaun husi entidade kompetente. Momentu neeba loke hela atividade refere, polisia too kedan iha fatin hodi halo atuasaun.
Arguidu hatene katak, loke bola guling sein autorizasaun husi autoridade lokal, maibe kontinua halo aktu refere.
Tanba nee, Ministeriu Publiku (MP) akuza arguidu hanesan autor ba krime esplorasaun Ilisitu ba jogu neebe previstu iha artigu 322 husi Kodigu Penal.
Hatan ba akuzasaun neebe iha, arguidu deklara katak, faktus neebe konsta iha akuzasaun loos hotu, arguidu rekonhese hanesan nain ba bola guling, no momentu neeba loke bola guling arguidu la husu autorizasaun husi Xefe Suku, Xefe Aldeia no parte sira neebe iha kompetensia.
Arguidu deklara, sasin sira neebe arguidu utiliza ba loke bola guling pertense ba arguidu nian.
Nunee arguidu arepende tebes ba nia hahalok nee, hahu kedan husi neeba mai too agora, arguidu la pratika tan aktu refere.
No Tribunal haree katak arguidu konfesa imparsial ba faktus neebe iha, tanba nee Tribunal husu atu Ministeriu Publiku (MP) tama kedan ba iha faze alegasaun.
Iha alegasaun Ministeriu Publiku (MP) haree katak, arguidu konfesa imparsial ba faktus neebe iha, tanba nee arguidu nia konduta prienxe ba iha elementu krime neebe iha.
Tanba nee MP mantein ho akuzasaun neebe iha, husu Tribunal atu aplika pena multa ba arguidu.
Aleinde nee, defeza arguidu nian deklara katak, arguidu arepende nia hahalok, konfesa imparsial ba faktus, tanba nee aseita ho pedidu MP nian, maibe husu Tribunal tetu ho kondisaun arguidu nian atu aplika pena justu, maibe apar ho kondisaun arguidu nian.
Audensia julgamentu nee prezide husi Juiz Arjentino Nunes, Ministeriu Publiku reprezenta husi Prokurador Estajiadu ida, arguidu hetan asistensia legal husi Defensor Publiku nain ida.
Jornalista: Terezinha De Deus
Editora: Carme Ximenes
