BAUKAU, STLTIMORLESTE.com – Deskonfia hanoin barak tan hola feto rua (2), Elio da Silva idade 27 hakotu nia vida liu husi tara aan hodi husik hela feen no oan sira.
Insidente nee akontese iha Bairu Nunhelu, Aldeia Vila, Suku Poetete Vila, Postu Administrativu Ermera Vila, Munisipiu Ermera foin lalais nee.
Xefe Suku Poetete Vila, Arsénio Amaral haktuir, iha loron 19 Novembru nee vitima ba iha nia feen kiik nia uma iha area Likesu rezolve problema, maibe vitima nia feen boot no familia sira hotu la hatene, tanba vitima ba mesak no fila iha loron 20 Novembru 2025, pur-volta tuku 05:00 madrugada vitima hakotu nia vida liu husi tara aan iha kulu hun ida dook husi nia uma metru 200 resin.
“Dala ruma ho feto rua nee mak nia hodi tara aan nee karik. Feto boot oan nain 3 ferik oan kiik nee oan seidauk iha dehan labarik foin fulan 3,” Arsénio hakuir ba STL liu husi telefone, Kinta (20/11/2025).
Nia informa, hafoin insidente nee akontese parte Autoridade Suku no Polisia sira too kedas fatin akontesementu no koordena familia atu lori Elio da Silva nia mate isin ba prosesu autopsia, maibe parte familia la aseita, tanba matebian hakotu rasik nia vida.
Nunee parte Polisia aseita no orienta familia presta deklarasaun no aseitasaun ba la lori Elio da Silva nia mate isin ba prosesu autopsia.
“Familia dehan lae, nee laos ema ida mak haruka nia hakarak ba autopsia se mak atu responsabilidade neebe sira lakohi hotu nia inan, nia maun, nia ferik oan mos asina, depois Xefe Suku hau rasik asina se konkorda,” Arsénio hakuir.
Elio da Silva nia mate isin Autoridade Seguransa Munisipiu Ermera entrega ona ba familia hodi haloot tuir kultura ermera nian.
Jornalista: Tomas Reis
Editora: Carme Ximenes
