DILI, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu aprova ona intervensaun imediata ba Diretor Rejional Infraestrutura (DRI) neebe mak lidera husi Diretor Rejional Infraestrutura, Remigio Nuno Sila atu halo intervensaun direita ba estrada neebe ameas kotu iha Aldeia Faotbijae, Bairru Sikone, liga ba povu iha Suku Kutete no Bairru Nun Ana, Suku Nipane, inklui estrada husi Suku Naimeko ba Suku Monemeko Aldeia Leolbatan.
“Iha semana kotuk hau aprova ona intervensaun imediata Estrada Kutete neebe Kotu iha Bairru Sikone, Suku Bobokase, aprova Intervensaun nee, direita ba iha Diretor DRI, Remigio Nuno Sila atu haree asuntu estrada husi Bihala ba Kutete, inklui trosu ida ba Laokfoan, tanba iha neeba, udan bosok deit estrada nee sei kotuk, tanba nee ita halo ona despaisu instrusaun ba DRI,” dehan PA-RAEOA.
Nia dehan, aleinde nee, Autoridade RAEOA iha semana kotuk, aprova ona hodi kria komisaun antisipada ba kualker dezastre neebe akontese iha tempu udan, tanba nee DRI nia serbisu atu halo intervensaun karik dalan kotu karik, mota sae estraga komunidade nia uma no plantasaun iha natar no toos, ida nee pasparte antisipasaun dezastre kauza husi tempu udan tanba horiseik iha Oecusse udan boot, konserteza iha tempu udan mota sei tun.
“Ita serbisu hamutuk ho Autoridade Protesaun Sivil inklui mos diresaun rejional merkadu, antisipa udan boot, blokeia atividade komunidade mai asesu merkadu iha Oecusse, karik nesesidade bazika la tama iha merkadu, ita sei halo intervensaun iha merkadu, ida nee aprovadu pas parte serbisu antisipada ba situasaun emerjensia. Hau aprova ona antes hau mai Dili iha ambitu debate OJE iha espesialidade,” Haktuir PA-RAEAO.
Jornalista: Joseph Koa
Editor: Joseph Koa
