DILI, STLTIMORLESTE.com – Funsionariu públiku iha Ministériu Edukasaun (ME) hamutuk 65 sei tama iha reforma obrigatoriu iha fulan Janeiru 2026.
“Ami nian funsionariu públiku iha Ministériu nee hamutuk 65 mak sei tama reforma obrigatoriu iha fulan Janeiru 2026, profesores hamutuk 1597 mak sei tama iha reforma obrigatoriu. Ami 1596 profesores, husi nibel eskolaridade, hahu husi nibel pre eskolar, ensinu baziku, sekundariu no tekniku vokasional mak sei tama iha reforma obrigatoriu iha fulan Janeiru 2026, nee la sura ho ita nian profesores moras prelongada sira, tanba nee buat ketak ida,” dehan Diretor Rekursu Umanu Nasional iha ME, João Amaral ba jornalista STL, Segunda (24/11/2025).
Tuir Joao katak, maske sira tama ona iha reforma, maibe kada fulan sira nafatin hetan pensaun hanesan baibain, kona-ba sira nian prosesu ami servisu hamutuk ho Komisaun Funsaun Publiku atualiza hela reforma sira nee, hein fulan Janeiru implementa tuir dekretu lei neebe mak promulga husi prezidente.
Iha fatin seluk, Diretor Servisu Edukasaun Munisipiu Likisa, Julio da Silva dehan, tuir dadus rejista neebe iha profesor hamutuk 125 neebe mak tama ona ba idade reformadu.
“Dadus neebe ita submete ona ba Ministeriu Edukasaun. Ita iha total profesor reformadu hamutuk 125. Sira seidauk hatama karta rekerimentu ba iha Ministeriu Edukasaun, maibe sira hein deit lei reforma obrigatoriu,” dehan nia.
Entretantu Diretor Servisu Edukasaun munisipiu Ainaro, Patricio da Costa Magno hatete, profesor iha Ainaro mos hamutuk 129 mak tama ona ba idade reformadu.
“Iha Ainaro profesor hamutuk 129 mak tama ba idade reformadu kompostu husi mane 79, feto 50. Husi nivel pre-eskolar nain 4, ensinu baziku 120, ensinu sekundariu jeral 5,” dehan nia.
Profesor neebe mate ona hamutuk 70. Mane 43 feto 32. Moras permanente 11, feto 3 mane 8,” nia esplika.
Jornalista: Emerenciana Pinto
Editor: Xisto Mendonça
