DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu JB, tanba komete krime hasoru ofendida ASM.
Tuir akuzasaun katak, iha loron 29 Junhu 2024, tuku 6:00 dader, ofendida husu ba arguidu atu fila sedu ba uma tanba servisu barak iha uma.
Maibe arguidu sai la satisfeitu, nunee arguidu foti ai-tonka ida, no tebe beibeik iha lezada nia kotuk laran too ai-tonka rahun. Rezultadu husi arguidu nia hahalok halo ofendida sofre moras iha kotuk laran.
Arguidu atua ho livre no ho propozitu espesifiku atu baku beibeik lezada nia kotuk laran to ai tonka kotu, nuudar meiu nebe iha kapasidade atu prezudika lezada nia isin, hodi hamosu moras.
Arguidu mos hatene katak ninia hahalok nee bandu no bele hetan kastigu kriminal. Nunee arguidu nuudar autor ba krime ofensa integridade fizika ho forma violensia domestika, neebe previstu no punidu iha artigu 145 numeru 1 husi Kodigu Penal.
Hatan ba faktus nee, iha sala julgamentu arguidu konfesa ba Tribunal katak, problema nee akontese tanba ofendida nuudar arguidu nia feen deskonfia arguidu katak, arguidu amante ho nia oan sarani nia bei-oan, nunee arguidu nervozu lori ai-tonka baku ofendida.
Arguidu rekonhese, baku duni ofendida nia kotuk laran, no arguidu baku ofendida atu halai, maibe ofendida hamrik metin nafatin entaun ofendida no arguidu baku malu hodi ofendida ba hato keixa.
Arguidu deklara katak, bainhira arguidu baku ofendida la kona ofendida, no arguidu rekonhese katak nia baku ho ai-tonka ai nian, tanba iha momentu nee arguidu nia ain parte karuk kanek.
Aleinde nee, ofendida deklara, arguidu baku ofendida ho ai-tonka tanba ofendida deskonfia arguidu.
Ofendida deklara, antes nee problema seluk la iha, maibe momentu akontese problema, arguidu baku ofendida nia isin metan hotu, kuaze liu semana ida maka foin diak. No durante problema, ofendida ba subar iha kafe laran durante loron rua no kalan rua.
Rona tiha arguidu no ofendida, Tribunal husu atu tama kedan ba iha alegasaun.
Iha alegasaun nee Prokurador Ricardo Leite husu Tribunal atu aplika Pena Multa. No defeza Jose Maria Guterres mos aseita, husu Tribunal atu aplika pena multa.
Rona tiha alegasaun, ikus mai Juiz prosesu Ana Paula, desidi aplika pena multa US$ 180 ba arguidu.
Audensia julgamentu nee prezide husi Juiza Singular, Ana Paula, Ministeriu Publiku reprezenta husi Prokurador Ricardo Leite Godinho, arguidu hetan asistensia legal husi Defensor Publiku, José Maria Guterres.
Jornalista: Terezinha De Deus
Editora: Carme Ximenes
