BAUKAU, STLTIMORLESTE.com – Autoridade Protesaun Sivil (APC) hamutuk ho United Nations Development Programme (UNDP) realiza treinamentu, avaliasaun lakon no estragus ba Xefe Suku sira no linha setoriais sira Munisipiu husi Lautem, Vikeke no Baukau.
Tekniku APC Nasional Serafim da Costa hateten, treinamentu refere tarjetu ba Xefe Suku sira neebe partisipa iha treinamentu refere, kada Munisipiu ida delega Xefe Suku nain 3 inklui diretores no xefe seksaun koordena husi APC partisipa iha treinamentu refere atu ajusta planu APC nian iha futuru mai, tanba durante nee APC seidauk halo avaliasaun ba edifisiu no seluk tan neebe hetan estragus husi dezastre naturais, maibe foku liu ba estragus uma hela fatin no edifisiu sira bainhira hetan estragus kada Ministeriu halo avaliasaun rasik.
“Entuan avaliasaun ida nee ita kapasita i ao mesmu tempu ita halo planu ba risku no dezastre ruma, se fatin ida nee ita identifika risku ba dezastre entaun labele halo edifisiu uma iha fatin ida nee ao mesmu tempu Governu mos tenke iha ona mapamentu risku sira iha kada Munisipiu para dezenvolvimentu ita harii buat ruma karik ita mos sura risku sira nee hotu,” Serafim hateten ba jornalista sira, hafoin remata sesaun abertura, iha salaun apuramentu Vila Nova, Baukau, Segunda (24/11/2025).
Nia rekonhese, iha Timor-Leste maioria komunidade nafatin halo konstrusaun uma hela fatin iha area risku ba dezastre naturais nain hanesan mota ninin, tasi ibun no foho lolon, nunee liu husi treinamentu refere atu Xefe Suku sira intrudus ba komunidade atu evita konstrusaun uma iha fatin risku sira neebe mensiona ona.
Tanba politika resposta apoiu emerjensia ba vitima dezastre naturais nian iha Timor-Leste gastus ona orsamentu barak, maibe komunidade seidauk iha konsensia kontinua konstrui uma iha fatin risku sira, nunee liu husi treinamentu refere bele redus despenza apoiu emerjensia nian.
“Hau hanoin treinamentu ida nee foin mak ita hahu, depois tuir mai ita sei planu servisu hamutuk ho UNDP kontinua sosializa ba ita nia komunidade sira,” Serafim katak.
Nia husu komunidade sira evita halo konstrusaun uma iha fatin risku sira, no husu Autoridade Suku sira apoiu ekipa Autoridade Protesaun Sivil husi Munisipiu 3 refere, identifikasaun no avaliasaun ba fatin risku sira iha nivel Suku.
Xefe Suku Bibileo Moises A. da Costa husi Postu Administrativu Vikeke Vila, Munisipiu Vikeke agrasede ba Governu liu husi APC no UNDP bele fasilita ona treinamentu ba Autoridade Suku no entidades seluk tan, tanba liu husi treinamentu refere bele aprende lisaun kona-ba avaliasaun lakon no estragus husi dezastre naturais nian, maibe husu Governu atu kria kondisaun, tanba maioria komunidade iha Suku Bibileo hela iha mota okos neebe kada tinan sempre afeta ba inundasaun.
“Kada tinan ita sempre hasoru tanba ami hela iha kraik mota iha leten entaun kuandu udan boot volume makaas ami iha kraik uma ema animal sempre, ita atu ses maibe area neeba java nia tempu inimigu mak soe iha neeba, ami bele sai mais hein katak Governu mak lori sai ami,” nia informa.
Moises informa, hanesan Autoridade informa ona ba parte kompetente, atu haree komunidade iha Suku Bibileo prontu atu sai maibe prezisa Governu nia prezensa.
Jornalista: Tomas Reis
Editora: Carme Ximenes
