DILI, STLTIMORLESTE.com – Prezidente Republika (PR), Jose Ramos Horta ofisialmente loke feira ba selebrasaun istoriku Aniversariu Proklamsaun Indepedensia Timor Leste ba dala 50, iha Tasi Tolu, Dili.
Iha loron Segunda loraik (24/11/2025) Prezidente Republika, Jose Ramos Horta loke ofisialmente Feira Nasional iha Tasi-Tolu, hodi marka inísiu ba selebrasaun Aniversariu Proklamasaun Unilateral Independensia Republika Demokratika Timor Leste nian ba dala-50.
Abertura nee serve nuudar omenajen ba nasaun nia reziliensia, halibur sidadaun no dinitariu sira hodi onra deklarasaun unilateral istorika neebe halo iha tinan 1975 no hodi hatudu dezenvolvimentu nasaun nian durante meiu-seklu ikus nee.
Loke ba publiku husi loron 24 too 29 fulan novembru, Feira Nasional nee organiza husi Ministeriu Administrasaun Estatal, neebe kada pavilaun munisipal aprezenta produtu agríkola ho apoiu husi Governu no ajensia internasional, no mos hatudu atinjimentu sira hodi prepara ba kamara munisipal iha tinan 2027. Sidadaun sira bele asesu livre hodi haree arte, kultura, no kriatividade husi grupu joven sira neebe promove identidade munisipal, enkuantu Ministeriu Komersiu no Industria mos organiza feira ai-han lokal nian.
Hafoin festividade publika, Xefe Estadu partisipa iha entrevista televiziva espesial ida ho RTTL, E.P. neebe sentra iha tema kona-ba uza pasadu hodi inspira konfiansa iha prezente no esperansa ba futuru. Durante entrevista, Prezidente Republika Ramos-Horta oferese reflesaun istorika detallada kona-ba loron krítiku sira antes 28 Novembru 1975, hodi fahe ninia esperiensia pesoal iha frente diplomatika no desizaun estratejika sira neebe foti husi lider nasional sira hodi afirma soberania iha situasaun vaku administrasaun nia laran.
Prezidente Republika konklui hodi sublina Timor Leste nia viajen notavel husi izolamentu diplomatiku too sai lian neebe ativu no respeitadu iha palku global, liuliu iha Nasoens Unidas. Hodi enfatiza kontraste entre luta iha 1975 no realidade ohin loron nian, nia hatoo mensajen unidade ba povu timoroan, hodi husu nasaun atu foti forsa husi ninia istoria hodi kontinua konsolida Estadu no harii futuru neebe prosperu.
Nunee mos Ministru Administrasaun Estatal, Tomas Cabral hatoo, agradese ba Aman Maromak, tamba ho grasa hotu neebe simu, ohin loron bele fo liman ba malu, atu servisu hamutuk hodi serbí rai doben Timor Leste.
“Nuudar Ministru Administrasaun Estatal neebe asumi mos responsabilidade nuudar Prezidente Komisaun Organizadora ba dias nasionais hakarak agradese ba Sua Exelensia Prezidente Republika neebe mak maske kolen tamba viajen dook, maibe bele mai hola parte iha eventu ohin loraik Abertura Expozisaun Dezenvolvimentu Governasaun Lokal iha prasa tasi tolu,” dehan governante nee.
Nia dehan, tinan 2025, nuudar tinan ida neebe mak Republika Demokratika Timor-Leste hanoin hikas fali Independensia Unilateral neebe proklama iha 28 Novembru 1975, neebe mak ba iha tinan ida nee, selebra tinan 50 ho tema “Que a celebração destes 50 anos, do passado, nos assegure confiança no presente e esperança no futuro.
Jornalista: Emerenciana Pinto
Editora: Carme Ximenes
