DILI, STLTIMORLESTE.com – Universidade Catolica Timorense (UCT) realiza expo ou feira empreendedor, tanba kolaborasaun no konfiansa husi Ministeriu Ensinu Superior.
Kestaun nee hatoo husi Reitor UCT, Padre Joel Casimiro Pinto ba jornalista iha Balide, Tersa (25/11/2025).
Nia hatete, expo nee hahu iha Segunda, no realiza tanba hetan kolaborasaun no konfiansa husi Ministeriu Ensinu Superior.
“Expo nee hahu tiha horiseik, expo nee realiza tanba kolaborasaun no konfiansa husi Ministeriu Ensinu Superior. Tanbasa mak hau dehan kolaborasaun no konfiansa, tanba programa ida expo nee husi Ministeriu Ensinu Superior nian, maibe Ministeriu hanesan oferta ida hodi loke konkursu hodi instituisaun bele partisipa hodi sai manan nain ba projetu ida-nee, no ikus mai UCT mak fiar dahuluk. Lahatene tinan oin universidade seluk mak bele hetan fali,” dehan Reitor nee.
Padre dehan, ida nee sai hanesan faze primeira ba Universidade Catolica Timorense atu kontinua promove siensia no teknolojia nee iha aban no bainrua.
Alende nee Expo iha atividade oioin, ida mak naran formasaun ba embaixador siensia no teknolojia katak sira nee aban bainrua sai promotor ba teknolojia nee hahu tiha ona fulan-Outobru liuba nee, nee reprezentante grupu husi universidade sira hanesan IPDC, UNDIL, ISC marka prezensa iha nee hodi partisipa formasaun iha etapa primeiru.
“Depois durante loron haat expo sira kontinua nafatin partisipa iha seminariu sira, neebe ita konvida husi ita-nia maluk sira husi estranjeiru, hanesan Universia Kristia Wacana no Universidade husi Kupang, nomos iha kolaborasaun hamutuk ho instituisaun sira hanesan Word Bank Group neebe promove kona-ba empreendedorizmu kiik sira nomos iha sira seluk tan,” dehan Padre.
Nia katak, orsamentu ba expo nee mai husi Governu liu husi Ministeriu Ensinu Superior ho total rihun US$ 90.
Jornalista: Emerenciana Pinto
Editora: Domingas Gomes
