DILI, STLTIMORLESTE.com – Eskola Sekundáriu Jeral (ESJ) FINANTIL sei menus livrus siensia naturais ba estudantes sira, maibe husi parte eskola halo ona pedidu ba Ministériu Edukasaun (ME).
Diretor ESJ FINANTIL, Aniceto Berlelo hatete, sira husu atu melora tan fatin ba biblioteka, no dadaun nee sira halo ona pedidu ba nasional, liu-liu livru ba materia siensia naturais nee mak sei menus.
“Ami nian biblioteka nee iha, maske iha fatin balun seidauk asegura livrus sira nee ho diak, entaun asegura livrus nee labele iha, tanba fatin deit laiha. Ami nia livrus nee tau ona iha fatin, depois estudantes sira mos bele asesu livrus nee no balun impresta livru lori ba sira nian uma no balun estuda iha sala laran, maibe husu fatin nee mak tenke melora tan halo diak, atu nunee estudantes sira nee bele asesu livrus nee ho diak liu tan,” dehan Diretor nee ba STL, Kuarta (26/11/2025).
Nia hatete, relasiona ho livru siensia naturais neebe too agora sei menus, eskola hatama ona pedidu iha fulan hirak liu ba maibe rezultadu seidauk iha, no livrus balun husi edukasaun fo ona ba sira.
Iha fatin seluk Diretor Nasional Ensinu Sekundariu iha ME, Benjamin Gomes da Cruz Fernandes dehan, bainhira eskola neebe sei menus livrus, tenke halo pedidu mai Ministériu, para husi kurrikulu bele fo apoiu livrus sira nee.
Jornalista: Jacinta Sequeira
Editora: Domingas Gomes
