BAUKAU, STLTIMORLESTE.com – Besik ona fulan ida deskonfia operador bee moos iha Suku Kaibada Makasae, Postu Administrativu Baukau Vila, Munisipiu Baukau, taka bee moos ba komunidade.
Komunidade Aldeia Data-Ua, Agostinho Ximenes informa, fornesementu bee moos ba komunidade sira iha Suku Kaibada Makasae hetan apoiu kanalizasaun husi parseiru dezenvolvimentu World Vision Timor-Leste, neebe entrega ba GMF hodi tau matan no fornese ba komunidade sira, maibe besik fulan ona komunidade sira halerik bee moos, tanba operador bee lakohi loke bee.
“Hau hanoin ema neebe operator durante tinan ida resin la selu, Xefe GMF lakohi loke enkontru ema konsumidor sira selu ba ema operator nee lakohi loke bee mai,” Agostinho hateten ba jornalista sira, iha Data-Ua, Kuarta (26/11/2025) .
Nia sublina, operador bee besik ona fulan ida lakohi loke bee ba komunidade sira, tanba liu ona tinan ida, maibe komunidade konsumidor seidauk halo kontribusaun osan kada fulan ba parte GMF.
Nia fundamenta, razaun komunidade la halo kontribusaun osan kada fulan ba GMF, tanba Xefe GMF rasik husi inisiu too ohin loron seidauk realiza enkontru ho komunidade konsumidor sira, nunee komunidade konsumidor seidauk intende metodu selu bee, maibe hanesan konsumidor prontu kontribui bainhira parte GMF realiza enkontru esklarese ona metodu selu bee ho komunidade konsumidor sira.
“Komunidade prontu atu selu tanba bee iha fali ami nia okos ami iha fali foho leten, tanba nee kontente atu selu ema operator konta ba bee ida nee agora la loke. Enkontru para ita selu oinsa entuan liu husi enkontru mak ami foin selu orsamentu ida nee,” Agostinho akresenta.
Komunidade nee deklara, durante operador taka bee kuaze komunidade sira lao ho pur-volta metru 500 ba bee matan Uaite, Uaidasu no Komololi hafoin komunidade sira kuru bee hodi utiliza ba nesesidade diaria, maibe difikulta tebes labarik estudante sira, tanba la hariis ba deit eskola, nunee husu Autoridade Suku atu koordena ho ekipa GMF solusiona bee moos iha Suku refere.
Iha sorin seluk, Xefe Suku Kaibada Makasae, Julio Alegria Belo rekonhese komunidade sira besik ona fulan ida la asesu bee moos, tanba iha failhansu balu, maibe sei solusiona iha tempu besik.
“Laos manutensaun ba parte kanu iha failhansu oituan kona-ba komunidade halo atendimentu ba ita nia operador, maibe la signifika katak la uza fila fali bee moos neebe iha, tanba tempu ita mos prepara aan ba loron komemorasaun dia 28 Novembru entaun hau sei halo koordenasaun ho GMF iha suku ida nee sira mos konkorda katak tur hamutuk rezolve ida nee tanba bee importante no esensial ba ita nia komunidade,” Alegria katak.
Xefe Suku nee fundamenta, preokupasaun refere nia koordena ona parte GMF Suku Kaibada Makasae no sei rezolve iha tempu besik, bainhira seremonia komemorasaun loron Proklamasaun Unilateral Independensia Timor-Leste ba dala 50 remata ona.
Too notisia nee publika STL seidauk hetan konfirmasaun husi parte operador bee moos iha Suku Kaibada Makasae, tanba la hetan nia paradeiru.
Entretantu komunidade hirak neebe daudaun halerik ba bee moos hamutuk Xefe familia 387, kompostu husi Aldeia Kaiobilale no Data-Ua ho total populasaun rihun ida resin.
Jornalista: Tomas Reis
Editora: Carme Ximenes
