BAUKAU, STLTIMORLESTE.com – Makina bomba bee iha Suku Fatulia, Postu Administrativu Venilale, Munisipiu Baukau, avaria ona tinan 2 rezulta komunidade halerik ba bee moos, maibe parte kompetente seidauk halo manutensaun.
Xefe Suku Fatulia, Angelino Moisés Pereira esplika, iha tinan 2017 Bee Timor-Leste, Empreza Publiku (BTL,EP) implementa projetu kanalizasaun bee moos, husi bee matan Uatuteu ba komunidade sira iha Suku Fatulia inklui komunidade sira iha Venilale Vila, neebe projetu refere finaliza ona iha tinan 2018, maibe komunidade sira seidauk asesu bee moos husi kanalizaun refere, tanba projetu kanalizasaun refere seidauk inagura, maibe iha tinan 2023 makina bomba bee avaria no too ohin loron parte BTL,EP seidauk halo manutensaun.
“Projetu nee termina tiha iha 2018 maibe komunidade mos la asesu nafatin bee tanba bomba aat parte BTL la tau atensaun masimu iha bomba. Nee akumula bee no ahi nee rasik besik 800 ribuh,” Angelino hateten ba STL, liu husi telefone, Kuarta (26/11/2025).
Nia informa, projetu kanalizasaun bee moos refere BTL,EP gastus ba kontrusaun, instralasaun fiu eletrisidade no kanalizasaun ho distansia kilometru 5 husi bee matan too iha area urbana Venilale ho orsamentu besik rihun US$ 800, maibe komunidade seidauk asesu bee moos, tanba bomba bee avaria iha tinan 2023.
Nia konsidera, projetu refere gastu orsamentu boot neebe nia tarjetu atu responde ba komunidade sira iha Suku Fatulia hamutuk Aldeia 3 mak hanesan Bahadato, Uaitobonu inklui Uatuliana sorin ho total populasaun 3.073 nia preokupasaun inklui komunidade sira hela iha area urbana Venilale, maibe la serteza responde, tanba makina bomba bee avaria.
“Soe orsamentu boot maibe Povu nee halerik nafatin ba bee, agora bee neebe iha hela lakohi halo diak depois soe hela Povu la sente efetivu, hau sujere ba BTL atu mai haree bomba neebe mak tau iha nee, konstrusaun no bele mai melhora tan nia kanalizasaun hadia bomba sira nee povu neebe sorin uza sorin seidauk uza nee teknikamente sira fahe hela bee nee para komunidade sira bele hetan bee,” Angelino sujere.
Hatan ba kestaun nee, Koordenadora BTL,EP Munisipiu Baukau, Adriana Belo da Rosa hateten, iha tinan 2018 BTL,EP seidauk eziste. Projetu refere laos implementa husi BTL,EP.
“Husu Xefe Suku halo pedidu mai BTL, kuandu bele BTL ba hadia, tanba neeba nee bee rural,” dehan nia.
Jornalista: Tomas Reis
Editora: Carme Ximenes
