DILI, STLTIMORLESTE.com – Prezidente Republika (PR), Jose Ramos Horta hatete, presiza kria kondisaun ba Timoroan sira atu estuda siensia teknolojia.
Prezidente Republika Jose Ramos Horta hatoo kestaun nee liu husi nia diskursu iha lansamentu satelite iha Palasiu Prezidensial, Nicolau Lobato, Bairo Pite, Kuarta (26/11/2025).
Nia hatete, presiza kria kondisaun ba estudante atu estuda siensia teknolozia iha eskola, uma, fatin serbisu no seluk tan.
“Ita tenke kria kondisaun ba joven timoroan sira atu estuda siensia no teknolojia iha uma, iha eskola, no iha serbisu fatin, hodi permite sira atu mehi boot no dezenvolve abilidade sira neebe fo benefísiu ba sira-nia an rasik, ba negosiu sira, ba komunidade sira no ba nasaun. Ita-nia oan sira merese oportunidade atu hateke ba lalehan no fiar katak sira bele too iha neeba, hodi transforma ideia sira ba projetu inovativu sira ho valor global,” dehan Horta.
Prezidente dehan, TL nia rain too iha pontu ida-nee tanba reziliente iha rekursu no nunka lao mesak, konta nafatin ho parseria nasaun belun sira no instituisaun internasional sira.
Misaun ida-nee hetan apoiu husi kolaborasaun internasional sira neebe makas, inklui universidade sira, enjeneiru no dedikasaun la kolen husi profisional joven sira rasik. Kolaborasaun maka forsa, no ida-nee maka oinsa nasaun kiik sira mosu.
Ba futuru sientista, enjeneiru, no programador sira sai kuriozu, sai aten-barani, no kontinua estuda Siensia, Teknolojia, Enjenaria, no Matematika (STEM) ho dedikasaun, dixiplina, no exelênsia. Iha oportunidade iha Timor-Leste, no esensial ba nasaun nia futuru.
“Ami nia komunidade emprezarial, hau enkoraja ita-boot atu kontinua apoia ami nia inovador sira, peskizador sira no emprezariu sira suporta start-up sira no inkubador sira, hanesan similie, neebe lori ideia foun sira, enerjia, no kriatividade. Investe iha teknolojia laos deit atu hetan lukru maibe nuudar fini ba nasaun neebe modernu no dezenvolvidu. Ita-boot nia lideransa krusial atu harii kapital umanu neebe Timor-Leste presiza urjente,” dehan Horta.
Xefe Estadu dehan, Mmsaun Timor iha espasu marka inísiu foun ida. Mai hamriik hasoru dezafiu ida-nee, hamutuk, determinadu no fiar aan.
Jornalista: Emerenciana Pinto
Editora: Domingas Gomes
