DILI, STLTIMORLESTE.com – Prezidente Republika (PR), Jose Ramos Horta hatete, Primeiru Ministru Kay Rala Xanana Gusmão ho Eis Primeiru Ministru Mari Alkatiri neebe nunka koalia ba malu nee normal, ida nee laos konflitu armadu, neebe atu halo mediasaun.
Liafuan nee Prezidente Republika Jose Ramos Horta hatoo liu husi nia aprezentasaun iha meeting pers neebe organiza husi SEKOMS iha Palasiu Prezidensial Nicolau Lobato, Bairru Pite, Kuarta (26/11/2025).
Nia katak, hatete lider nain rua la koalia ba malu maibe sira idak idak moris hakmatek iha sira nia fatin, nee laos konflitu armada tanba nee atu halo mediasaun hodi rejolve.
Horta hatete, nia rasik partisipa mediasaun iha liur neeba nee barak, maibe laos mediasaun entre nain rua neebe moris hakmatek iha sira nia rai, sira nia uma laiha funu laiha guera, tanba deit la koalia ba nuudar Premiado Nobel da pas tenke ba halo mediasaun nee lae.
“Laiha konflitu armadu, ita haree iha parlamentu partidu sira halo sira nia serbisu konforme nia partidu balun malkriadu, balun hakilar hanesan atu mate ona mais nee sira nia partidu akontese iha parlamentu laran, normal nee laos pior liu fali kongresu Amerikanu Parlamentu Australia,” dehan PR Horta.
Nia afirma, foin dadaun iha Inglatera Prezidente Parlamentu fo ordem ba seguransa kaer Primeiru Ministru lori sai ba liur, tanba PM hatudu malkriadu ida nee akontese iha Inglatera. Inglatera demokrasia numeru um iha mundu, mais sira mos nunee ida nee laiha problema.
“Ita nia demokrasia iha ASEAN numeru um liberdade imprensa, foin dadaun tinan ruma liu ba numeru 10 iha mundu depois imi tuur iha nee (Jornalista), imi mak kritika tun sae pois ita nia problema media nee tun tan fali ba 39, maibe ida nee laos problema media maibe hau rona no husu tansa sa derepente tun fali, tanba buatamak balun iha setor justisa bolu bebeik jornalista sira ba halo interogatoriu hau rona, tanba ida nee laos buat seluk,” dehan nia.
Prezidente hatete, tinan hira ba kotuk haree lider balun satiadu ho buat balun neebe fo sai iha jornal, nia hatete sei koalia ho diretor jornal Prezidente resposta diak liu lalika.
Horta afirma, iha Timor nunee se hakarak buat ruma konfidensial, diak liu labele hakerek konfidensial iha envelope. Se hakerek konfidensial ema hakarak lee duni, ida nee laos jornalista mak hetan segredu dokumentus, maibe iha funsionariu ruma mak hatoo sai ba jornalista hodi publika.
Jornalista: Emerenciana Pinto
Editora: Domingas Gomes
