DILI, STLTIMORLESTE.com – Prezidente Republika (PR), Jose Ramos Horta fo pose ba Manuel Antonio Araujo Serrano nuudar Embaixador foun Estraordinariu no Plenipotensiariu Republika Demokratika Timor Leste nian ba Republika Portugal.
Iha Kinta (27/11/2025) Prezidente Republika Jose Ramos Horta fo posse ba Manuel Antonio Araujo Serrano nuudar Embaixador foun Estraordinariu no Plenipotensiariu Republika Demokratika Timor Leste nian ba Republika Portugal. Serimonia tomada de pose nee halao iha Palasiu Prezidensial Nicolau Lobato.
Embaixador Manuel Antonio Araujo Serrano nuudar distintu diplomata ho ninia karreira inklui knaar signifikativu sira iha fundasaun nomos iha governu, tanba serbí ona nuudar Prezidente Fundasaun Xanana Gusmão husi tinan 2002 too 2006, Xefe Gabinete ba Ministru Senior no Ministru Negosiu Estranjeiru no Kooperasaun, Jose Ramos-Horta husi tinan 2006 too 2008, Diretor ba Komisaun Amizade no Verdade (CAV) entre Timor-Leste no Indonezia, no nuudar Konsul-Jeral RDTL nian iha Denpasar, Bali (2006-2008).
Ninia kargu diplomatiku aas liu maka nuudar Embaixador Estraordinariu no Plenipotensiariu Republika Demokratika Timor Leste nian ba Republika Indonezia husi tinan 2009 too 2016. Foin lalais nee Embaixador Manuel Serrano nuudar Diretor-Jeral SNI iha Gabinete Primeiru-Ministru (2017-2021), no servisu nuudar Konselleiru ba Visi Primeiru-Ministru no Ministru Koordenador Asuntu Sosial no Asuntu Ekonomiku husi 2023 too 2025.
Prezidente Ramos-Horta hatoo nia konfiansa katak, Embaixador Serrano nia esperiensia diplomatika neebe klean sei kontribui signifikativamente ba aprofundamentu relasaun bilateral entre Timor Leste no Portugal.
“Ita-nia relasaun ho Portugal hanesan pilar fundamental ida ba ita-nia polítika esterna, neebe harii iha istoria, kultura, no lian partilhada. Embaixador Serrano nia lideransa no abilidade diplomatika neebe komprovadu sei sai instrumental hodi avansa kooperasaun no promove oportunidade foun ba kolaborasaun,” dehan Horta.
Sekretariu Jeral MNEK Juvencio de Jesus Martins hatete, ohin Prezidente Republika Jose Ramos Horta fo posse ba Embaixador foun Manuel Antonio Araujo Serrano nuudar Embaixador Foun Estraordinariu no Plenipotensiariu Republika Demokratika Timor Leste nian ba Republika Portugal, hodi troka embaixadora Embaixadora Izabel Guterres neebe halao knaar durante tinan 5.
“Embaixador ohin simu tomada de posse nia sei ba hatutan fali saida mak embaixadora tuan halao iha Portugal, nunee mos embaixador foun serteza ke sei iha planu foun nuudar Embaixador Foun Estraordinariu no Plenipotensiariu Republika Demokratika Timor Leste nian ba Republika Portugal nia sei halao iha neeba hodi reprezenta Timor Leste iha Portugal,” dehan nia.
Nunee mos Embaixador Foun Estraordinariu no Plenipotensiariu Republika Demokratika Timor-Leste nian ba Republika Portugal Manuel Antonio Araujo Serrano hatoo agradese ba Governu no Prezidente Republika neebe fo ona komfiansa ba nia hodi reprezenta TL iha Portugal.
“Senhor Prezidente deposita komfiansa ida ba hau atu halao knaar ida nee, tanba antes nee hau hetan knaar hanesan embaixador Timor Leste ba Indonezia, no ida nee segundu kargu embaixador TL ba Portugal, agradese deit ba komfiansa neebe mak Governu no estadu haraik ou hatoo mai hau,” hakotu Embaixador.
Jornalista: Emerenciana Pinto
Editora: Domingas Gomes
