DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun deside aplika pena suspensaun ba arguidu DdS.
Iha sala julgamentu laran Juiza Fransisca Cabral deklara katak, Ministeriu Publiku akuza arguidu ho krime rua, Abuza Konfiansa Agravadu no Burla Agravadu neebe previstu no punidu tuir artigu 267 no artigu 257 husi Kodigu Penal.
Juiza deklara, depois de rona tiha arguidu no lezada CPLFA Tribunal Kolektivu konsidera katak, la provadu ba iha krime Burla Agravadu. No Tribunal konsidera, provadu ba iha krime Abuzu Konfiansa, hodi aplika pena prizaun tinan tolu suspende tinan tolu ba arguidu.
Tribunal mos husu arguidu atu indimiza osan Seisentos dolar ba lezada.
Lee tiha desizaun, Juiza mos fo hanoin ba iha arguidu katak, se la konkorda ho desizaun Tribunal nian, bele halo rekursu ba iha Tribunal Rekursu, dentru prazu loron 30.
Antes nee, iha alegasaun Prokurador deklara katak, iha krime rua maka akuza ba arguidu, tanba nee Ministeriu Publiku (MP) husu Tribunal atu aplika pena prizaun tinan tolu resin ba arguidu.
Enkuantu Defeza haree katak, arguidu devolve ona osan, kolabora ho justisa, tanba nee husu atu aplika pena suspensaun ba iha arguidu.
Tuir akuzasaun katak, entre tinan 2018 ou 2019 nia laran, lezada CPLFA nia laen HBCCC sosa karreta Triton ida, xapa matricula CLS. 2124 husi nia kolega.
Sosa tiha hotu troka fali naran (balik nama) dokumentu kareta nian tau lezada CPLFA nia naran. Antes dia 18/10/2021, lezada nia laen fo konfiansa ba lezada nia maun maka baibain fo karreta nee ba ema aluga buka osan.
Iha loron 18/10/2021, lezadu nia maun no subrinhu maka halo akordu aluger ho arguidu iha lezada nia maun nia uma iha Taibesi.
Tanba nee maka kona-ba konteudu akordu aluger ba karreta ne, lezada rasik lahatene, maibe lezada nia maun maka hatene liu.
Mesmu nunee, lezada iha konhesimentu oituan katak, arguidu aluga karreta nee durante loron 31, no kada loron selu US$100 (dolar atus ida).
Iha loron 24/11/2021, foin arguidu halo pagamentu prestasaun metade (husi kontratu loron 31 nian ho osan US$3. 500), no kontinua la selu too agora, ikus mai arguidu ba pinora tiha lezada nia kareta refere ba ema Lospalos ida hela iha Tasi Tolu-Dili.
Desde karreta nee iha arguidu nia liman too agora hamosu prejuizu ba lezada ho nia familia, no afeta mos ba sira nia negosiu tanba sira depedente deit ba sira nia karreta refere.
Lezada rasik lahatene osan hira tan maka arguidu tenke selu husi aluga nee, tanba kona-ba osan, lezada nia maun maka hatene liu, tanba nia maka halo kontratu ho arguidu.
Konforme lezada nia maun hateten ba nia katak, karreta nee ema ida maka konduz hodi halai iha Dili karan, tanba nee husu atu fo fila lezada ninia karreta refere hodi halao ninia negosiu.
Lezada nia maun, testemuña deklara katak, iha loron 18/10/2021, tuku 08:00 arguidu ho lezada selebra akordu aluger karreta iha testemuna nia uma iha Aldeia My Friend, Taibesi-Dili.
Iha mumentu nee arguidu dehan ba nia katak karreta nee NGO elan Internasional maka aluga, maibe liu husi arguidu.
Arguidu ho intensaun hodi maneira lohi no bosok hodi dezafia no abuza konfiansa neebe maka testemunha depozita ba nia liu husi akordu aluger kareta.
Konsekuensia husi konduta arguidu nian, halo lezada CPLFA hetan prejuizu osan US$4.700 (dolar rihun hat atus hutu).
Tanba nee, arguidu DdS hanesan autor material ho forma konsumadu, hodi pratika iha konkursu krime rua, abuza konfiansa agravadu no Burla agravadu neebe previstu no punidu tuir artigu 267º n. 1 al. a,b,c), artigu 257º n. 1, 35° hotu-hotu husi Kodigu Penal.
Audensia julgamentu nee prezide husi Juiz Kolektivu, Fransisca Cabral, Jose Escurial, Juiz Estajiadu nain ida, Ministeriu Publiku reprezenta husi Prokurador, Bartolomeo de Araujo, arguidu hetan asistensia legal husi Defensor Publiku, Juvinal Dias.
Jornalista: Terezinha De Deus
Editora: Carme Ximenes
