DILI, STLTIMORLESTE.com – Polisia Nasionál Timor Leste (PNTL) liu husi Diresaun Tránzitu Seguransa Rodaviaria Nasionál (DTSRN) sei koalia ho Diresaun Nasionál Transporte Terrestre (DNTT) halo lejislasaun, hodi kontrola kareta neebe para kleur iha dalan públiku.
Nia rekonhese katak, molok nee husi Tránzitu Seguransa Rodaviaria Nasional hamutuk ho DNTT implementa kareta sira neebe para dalan públiku so para deit minutu 5, liu minutu 5 polísia tranzitu sei foti ho mekanizmu kontrolu sira hanesan atu evita engarrafamentu iha dalan publiku.
“Husi komando nian ba oin hau sei halo koordensaun fila fali ho DNTT, tanba iha loron hirak liu ba hau hetan konvite Diretór Nasionál Seguransa Rodaviaria MI nian, ami mos koalia kona-ba ida nee, ninian kontinuidade ita atu hahú fali,” hatete Diretor Tránzitu Seguransa Rodaviaria Nasionál (DTSRN), Superintendente Xefe Polísia António Mauluta ba jornalista sira iha nia knaar fatin Komando Jeral PNTL Kaikoli, Kinta (27/11/2025).
Nia esplika, durante nee ema barak preokupa katak, molok nee husi tránzitu no DNTT implementa ona zero toleránsia ba kareta neebe para iha dalan publiku liu minutu 5 sei foti, tanba sá halo tiha ida nee la lao ona.
Nia informa, ida nee la lao tanba husi Diresaun Tránzitu Seguransa Rodaviaria Nasional no DNTT mak deside suspende tiha lai hodi haree halo tiha avaliasaun lai ba kestaun sira ne’ebé implementa ona nee.
“Ita halo ida nee tenke bazeia ba iha lejislasaun ruma, ita halo ida nee maibe kuandu ema husu imi implementa ida nee bazeia ba baze legál saida, lei númeru hira, tanba nee ita husik oituan lai, ita sei tuur hamutuk DNTT nunee kria tiha baze legal ba ida nee, ita komesa implementa fali,” nia deklara.
Nia hatutan, ba kestaun sira hanesan nee presiza halo diploma ruma hodi nunee halo tiha sosializaun ba públiku mak foin implementa.
“Ami sei buka kona-ba ida nee (para cinco minuto) ho ida nee mak ami sei koalia ho DNTT nunee ba oin ita sei reativa fali ida nee,” nia koalia.
Jornalista: Jeniche da Costa
Editor: Xisto Mendonça
