DILI, STLTIMORLESTE.com – Portavoz Seguransa Ministeriu Interior Interino, Superintendente Asistente Polisia Mouzinho Correia dehan, insidente diariu neebe akontese husi loron 16-23 Novembru 2025 hamutuk 66.
“Iha semana ida liu ba hahu husi dia 16 -23 Novembru 2025 iha teriroriu Timor laran tomak akontese insidente hamutuk 66, husi insidente ida nee violensia domestika nafatin okupa dahuluk, asaltu, ameasa, asaltu seksual no estraga propriedade,” dehan Mouzinho ba jornalista sira iha salaun MI Vila Verde, Kinta (27/11/2025).
Nia esplika, Munisipiu Dili hanesan munisipiu ida neebe mak okupa primeiru lugar ba insidente hotu, tuir fali mai Munisipiu Baukau, Oekusi, Vikeke no Lautém.
“Husi insidente sira nee hamosu krimi oin-oin, neebe ita nian sistema jestaun asidente nian rejista 74 aktus krimi, husi total ida nee ofensa ba integridade fizika simples sei okupa fatin dahuluk, Maustratu ba konjuje. ameasa no ofensa ba integridade fizika grave mak makaas,” tenik nia.
Nia dehan, relasiona ho asidente trafiku nian iha semana hirak kotuk liu ba, rejista mos kazu asidente hamutuk 39.
“Husi 39 nee rezulta 47 pesoas kanek kmaan, 24 pesoas kanek todan no nain 2 seluk mate, enkuantu haree husi reseitas sira neebe MI hatama husi fontes tolu mak infrasaun disiplinar, neebe kondutor sira halo, tasa husi kareta sira neebe tama iha Timor Leste liu husi postu integradu haat Sidadaun estrangeiru neebe ke tama sai TL,” dehan nia.
Nia argumenta, iha mos asidente balun neebe mak seriu relasiona ho ema nia vida mak iha horiseik no hodi bainrua sidadaun ida mate iha area Fatuhada wainhira atu ba Salom hodi massage, derepenti atakasaun too mate.
“Iha mos kazu suisidiu ida akontese iha Manatutu, vitima ho tinan 19, ho kazu nee PNTL Manatutu halo ona prosesu ba iha Ministeriu Publiku,” hatete nia.
Nia mos husu ba publiku atu mantein seguransa no ordem publiku iha ita nia ambiente, tanba seguransa mak ita hotu nia reponsabilidade no mos ba komunidade sira iha atividade balun neebe mak deskonfia atividade kriminal bele info lalais ba iha autoridade seguransa neebe mak besik.
Jornalista: EST 1
Editor: Xisto Mendonça
